Shillong, Nohprah 11 : U Nongialam ka Congress bad Chief Whip ka Liang Pyrshah Saleng A Sangma ha ka sngi Nyngkong, ula ong ba ka Congress kan dang ban shim rai ia u/ka kyrtong ban iakhun ia ka elekshon Lok Sabha na Tura Parliamentary seat.
Haba iakren bad ki nongthoh khubor, u Saleng ula ong “Ngim pat iakren shaphang kane (kyrtong MP na Tura) bad u President jong ngi. Ka Congress kam pat rai satia ym tang ia ka Tura hynrei ia kiwei ki jaka jong ka Ri India ruh”.
Haba kylli la un mih aireng hi kum u kyrtong ka Congress, u Saleng ula ong “Ia mynta hi ngam lah ban ong eiei halor kata. Watla nga dei u MLA, nga dei u nongialam ba don jingkitkhlieh bad nga hap ban khmih ia ki kam jong ka party bad hadien jong u paidbah ia kaba mynta”.
U Saleng ula ong ba ka Congress kam hap ban bud ia kiwei pat ki party tang namar ba kila pynbna ia ki kyrteng jong ki kyrtong ban iakhun. U ong ba ka congress ka dang jar jar halor kane ka kam bad ka dang pynkhlain ia ka party ba ki Block bad ki Polling Station.
Ka NPP dang shen kala kam ba kan sa knieh noh ia ka Shillong Parliamentary seat na ka congress ha kane ka kynti. U MLA ka Gambegre ula ong “Baroh ki party ki kren beit halor ka jingsngewskhem jong ki ha man la ki elekshon”.
U Saleng ula ong ba ki paidbah ki dang shaniah ha ka congress haa kynnoh ba dei ka bor jong ka pisa kaba khanglad ia ki nongialam kiba tbit ba kin wan rung sha ka jylli sain hima sima.
