Shillong Naiwieng 29: U Nongialam bad u MLA ka BJP, Bah Sanbor Shullai hynne ka sngi Balang, ula ong, ba ka seng BJP kan siang da ka carpet rongsaw ne ‘Red Carpet’ kum ka dak jong ka jingpdiang burom lada wan pyniasoh u Myntri Rangbah barim ka jylla u Dr Mukul Sangma bad u MP ka Shillong Parliamentary Constituency u Bah Vincent Pala sha ka seng BJP.
“Ngi kum ka seng ngi la don lypa iaka thong ban pynkhlain ia ka BJP bad ngi iatrei katba lah ban pynsngewthuh ia ki paidbah ban pyniasoh sha ka BJP, te lada u Bah Vincent Pala u wan rung sha ka BJP, ngin pdiang sngewbha da kaba siang syndon da ka Red Carpet” ong u Bah Sanbor Shullai.
Ha kaba iadei bad ka jingsaphriang ki khubor ba ka don ka jingiakren bad u Dr Mukul Sangma ban wan pyniasoh noh sha ka seng BJP, u Bah Sanbor Shullai ula ong, “Ngam don jingtip eiei halor kane, hynrei nga la shu iohi tang ha ki kot khubor, hynrei ma nga shimet hi, nga lah iakynduh ia u Dr Mukul ha ka ïingdorbar kaba la dep bad hadien katei kam ju don ka jingiakren ne jingiakynduh ia u Dr Mukul”
“Lada u Dr Mukul bad u Bah Pala ki wan pyniasoh sha ka BJP, ngin pdiang sngewbha da kaba siang da ka ‘Red Carpet’ namar kidei ki nongialam kiba la ih bha ha ka kam saiñ pyrthei ha ka jylla” ong u Bah Sanbor.
Haba kylli la u don kano kano ka jingthmu ban leit iakynduh bad ban iakren bad kitei ki ar ngut ki nongialam ban rung noh sha ka BJP, u Bah Sanbor ula ong, “Namar ba nga la iohi ia ki jingmih ha ki kot khubor kumta ynda nga ioh por, ngan leit kren bad kam don jingeh ia nga ban leit iakren ia ki bad lada ki pynpaw ia ka jongkloi ban pyniasoh sha ka BJP, kumta ngin sa pyntip sha ki nongialam kiba hakhmat jong ka BJP kiba don ha Delhi”.
U Bah Sanbor ula ong, ba kitei ki arngut ki nongialam kidei kiba la paw bha ha ka kam saiñ pyrthei ha ka jylla bad kidei ruh kiba la ih bha ha kane ka kam, kumta kan long kaba iahap shibun ia kiba lada ki rung sha ka BJP kadei ban long ha nongbah Delhi ha kaba ki nongialam kiba hakhmat eh jong ka party kin pdiang sngewbha ia ki sha ka seng BJP.
