SHILLONG, NOV 29: Ka Hynniewtrep Youth Council (HYC) ha ka sngi Balang kala kyrpad ia u Myntri ka tnad Social Welfare Bah Paul Lyngdoh ban tuklar lem ha ka ban pyn thikna ba ki ophis jong ka Sorkar Pdeng kin pyntreikam ia ka jingbhah kam kaba 44% na ka bynta ki riewlum jong ka jylla Meghalaya.
Ka HYC kala dawa ruh ba dei ban thung noh ia ka Fast Track Courts ban bishar kloi ia ki case kiba iadei bad ka NDPS bad ban pyntreikam ia ka Prevention of Illicit Traffic in Narcotic Drugs and Psychotropic Substances Act, 1988 (PIT-NDPS Act).
Ha ka shithi kaba la aiti sha u Myntri Sorkar, u President ka HYC u Bah Roy Kupar Synrem ula ong, “Ngi la kyntu ia ka sorkar Meghalaya ban shim ia ki sienjam ban pynthikna ba baroh ki ophis, jala pule bad kiwei kiwei kiba dei jong ka sorkar pdeng kiba don hapoh Meghalaya ba kidei ban bud ne pyntreikam ia ka Office Memorandum bad kiwei kiwei ki jingbthah kiba la ai da ka Sorkar Pdeng, ka Ministry of Personnel, Public Grievances and Pensions Department of Personnel and Training New Delhi, khnang ba ki samla trai ri jong ka jylla kin ioh jingmyntoi”.
Ula ong, ba katkum ka Office Memorandum No.360 1711 12004-Estt.(Res.) kaba la pynmih da ka sorkar India, Ministry of Personnel, Public Grievances and Pensions, Department of Personnel and Training New Delhi, ha ka 5 tarik u Naitung 2005; Office Memorandum jong ka 4 tarik u Naitung, 2007 bad COMPENDIUM OF INSTRUCTIONS No. F.No.36011/1/2022-Estt.(Res-I) dated14.10.2022, ka sorkar India kala aiad ban don ia ka Revision of quantum of reservation for Scheduled Castes, Scheduled Tribes and Other Backward Classes lada dei ba thungkam ha ka kyrdan Group ‘C’ bad ‘D’ kaba dei na ka bynta ki nongaplai kam kiba na kato ka thain ne shnong.
Katkum ka Office Memorandum and Standing Instructions, ha Meghalaya ka Percentage jingka Reservation ka long 1 % na ka bynta ki Scheduled Castes, 44% na ka bynta ki Scheduled Tribes bad 5 % na ka bynta ki Other Backward Classes.
“Ngi lah ioh katto katne ki jingtip ba kiba bun ki ophis, jaka pule, bad ki Undertaking kiba don ha Meghalaya kim shym la bud ryntih ia kitei ki Office Memorandum bad kunta ki samla trai ri kila duh ia ka lad ban iohkam ha ki ophis, jaka pule bad Undertaking jongka sorkar pdeng namar ka jingbym bud ryntih ia ki Office Memorandum,” ong u Synrem ha kaba ula bynrap ruh ba na ka liang u Myntri sorkar ula kular ban shimkhia ia kane ka mat bad ki bor kiba dei khmih.
Nalor kane u Bah Synrem ula ong, ba ka kynhun kala kyntu ia ka sorkar ban shim ia ki sienjam ban pynthikna ba ka Fast Track Courts/Special Courts kumba la kdew hapoh ka DREAM Project, na ka bynta ban bishar ia ki jingjia hapoh ka NDPS Act ba dei ban dei ban thung noh mardor khamtam ha ka East Khasi Hills District.
“Kumba long mynta, ym don Special Court ban shong bishar ia ki jingjia hapoh ka NDPS Act, kumta ki jingtian bishar kila sahteng da ki snem khamtam ia ki sakhi ki satar bad ia ki riewpaidbah ban ai jingkyrshan ia ki bor ka sorkar jylla ha kaban iakhun pyrshah ia u drok” ula ong.
Ula ai khublei ia ka tnad Social Welfare ha kaban sdang ia ka Drug Reduction, Elimination, and Action Mission (DREAM) ha ka 27 tarik u Jylliew 2023 da ka jingthmu ban pynkylla ia ka jylla sha ka jylla kaba lait na u droks bad ka ong, ba kadei ka polisi treikam khlem kano kano ka jingartatien ban pynduhjait ia ki jingdih kiba sniew bad ban pynlong ia ka imlang sahlang ban lait na ka jingngop ha ka jingkyrni na ki jingdih ia kaba baroh ki khnih lynti.
Hynrei kaei kaba sngewkhia bha ka long ba katei ka Mission/Policy kam dei ban long kum kiwei pat ki kot ki sla kaba itynnad tang ha ka kot hynrei kaba pulom ha kaban iaid shakhmat ne ban pyntreikam kumba la thrang.
U President ka HYC ula pyntip ruh ba ka kynhun kala kyrpad ia ka sorkar ban pyntreikam ia ka Prevention of Illicit Traffic in Narcotic Drugs and Psychotropic Substances Act, 1988 (PIT-NDPS Act).
“Ngi kwah ban kyntu ban shim ia ki lad ki lynti ban pynkhlain shuh shuh ban tehlakam ia ki nongkhaii droks, da kaba kem bad pynngat ia kiba donkti bad ki nongdie kiba la shah kem.palat ia ka shisien hapoh ki kyndon jongka PIT-NDPS Act,” ula ong.
Ula bynrap ba ka sorkar jylla kala thung ia ka Advisory Board kumba la kdew ha ka PIT-NDPS Act, 1988 bad haduh mynta katkum ka jingbthah ka jongka, tang 9 ngut ki briew kiba la donkti ha ka kam khaii drok bad kila shah kem haduh 3 snem.
“Ngi kyntu ia ka tnad ban shimkhia bad ban leh da kaba tyngeh ia kitei ki nongpynkhein ain,” ong u Synrem.
