Nongpoh, Naiwieng 29 : Ka Khasi Students Union (KSU)-North Khasi Hills District, hynne ka sngi Balang, kala pynpaw ia ka jingpyrshah kaba jur halor ka jingkynnoh ba ka Indian Oil Corporation Limited (IOCL) ka don jingthmu ban rah noh ia ka Oil Depot kaba don hajan ICAR, Umiam.
Halor kane, ka KSU kala leit ban ai da ka dorkhas sha u Deputy Commissioner ka Ri-Bhoi District haba pyntip ruh ba ka IOCL ka don jingthmu ban thaw pynban da kawei ka petrol pump ha katei ka jaka.
Lah ban kdew ba ha u 2015, ka KSU kala ai dorkhas sha ka Sorkar ba dawa ban pyntreikam biang ia ka Oil Depot jong ka IOCL ha Umiam hadien bala pynsangeh ia ka ha u snem 2010. Ka jingdawa halor ka nongrim ba kane ka jaka pynlang umphniang kan ai shibun ki jingmyntoi ia ki paidbah ka Jylla Meghalaya.
Haba kren sha ki nongthoh khubor, u President ka KSU-NKH Bah Ferdinald Kharkamni ula ong ba ka KSU kam kwah satia ban pynkynriah noh ia katei ka Oil depot na Umiam namar kane ka buh jingeh ia ki paidbah kiba la dep mad ruh la bun ki khep ia ka jingduna umphniang haba don ki jingiakhih hapoh ka Jylla Assam, kaba ktah ia ka jingpynpoi umphniang sha Jylla.
Une u Nongialam ka KSU u iathuh ba dang shen hadien ka jingshah khynra ki jaka pynlong umphniang beain ha Ri-Bhoi, kala mih ka jingbyrngem ban sangeh pynpoi umphniang sha ka Jylla. “Dei halor kane ka nongrim, ka Sorkar ka dei ban pynkhreh lypa da kaba pyllang ia ka umphniang lada don kino kino ki jingeh ha ka jingpynpoi umphniang na Assam.
“Ka KSU kala dawa teng ia ka Sorkar Jylla ban pynbiang ia ki Oil depot bad ki LPG bottling plant ha Jylla. Ka LPG bottling plant kala treikam mynta ha ka jaka ba marjan ka ICAR, Umuam bad kaba sahteng ka long satang ka jingpynurlong ia ka jaka pynlang umphniang (oil depot)” ula ong.
U Bah Ferdinald u iathuh ba ka Sorkar Jylla kala dep ban ai jaka ba heh haduh 5 acre ban pynim biang ia ka Oil depot ha Umiam.
