Shillong, Naiwieng 29: U Myntri Rangbah ka Jylla Conrad K Sangma hynne ka sngi Balang, ula leit peitkai ia ki jingiakhun jong ki rang iakura ha ka pympung 7th Elite Men’s National Boxing Championship kaba dang iaid shakhmat mynta ha SAI, NEHU.
Haba kren ha ka jingialang ba lyngkot, u Myntri Rangbah ula ong ba ka long ka burom ia ka Jylla ban ioh pynlong ia ka National Boxing Championship.
“Kala don ka jingpyrshang katba lah na ka Sorkar ban kyntiew ia ki kam ialehkai hapoh ka Jylla da kaba kyrshan ia ki Association, shna ia ki jaka ialehkai, shna ia ki jaka kilan met, ban ai jingithuh ia ki rang bad ki thei ialehkai bad ban pynlong ia bun ki lympung ialehkai” ula ong.
Haba pynthikna ba ka kam ialehkai kan ioh ia ka jingpynleit jingmut jong ka Sorkar, u Myntri Rangbah ula ong “Hynrei kin don ki jingtynjuh. Ngi ioh jinghikai bad ngin pynjanai ialade na kine ki jingtynjuh ba ngi iakynduh ha ka lynti iaid bad kyrmen skhem ba hadien habud ngin sa lah ban pynlong ia ki lympung ialehkai ki Ri ka pyrthei”.
U Myntri Rangbah ula ban jur ruh halor ka jingdonkam ban wad ia ka sap ialehkai naduh ka por ba dang khynnah bad ong “Lada ngi kwah ia ki Khynnah jong ngi ba kin khur takma bad wanrah nam ngi hap ban ithuh ia ka sap jong ki naduh ba ki dang khynnah, ai ka jinghikai kaba thikna ia ki khlem da ap haduh ba kin da kynjoh ia ka 10-15 snem ka rta”.
U Myntri Rangbah ula ong ruh ba ki khynnah ki dei ia kaban ioh ia ka kabu kaba dei bad ia ka jingsngewtynnad jong ki la ka dei ha ka kam ialehkai lane ka put ka tem, dei ban btin lynti ha ka lynti kaba dei. “Kane ka dei ka daw balei ba ngi wanrah ia ki prokram bapher bapher ia ki samla ha ka Jylla khnang ba ki jingsngewtynnad ba ki don kan ym shu sepei kai” ula bynrap.
Kiba la iadonlang ha kane ka sngi ki kynthup ia ka Director ka Tnad Sports & Youth Affairs Kong Isawanda Laloo, SK Shandil Technical Delegate bad Member ka Boxing Federation of India.
