Shillong, Naiwieng 28 : Ka Women Helpline 181 kala ioh pdiang ia palat 36,000 tylli ki SOS call ba pan ia ka jingiada bad jingiarap na ka jingshah kren tohmet bad shah thombor ki Kynthei hapoh Meghalaya.
“Ng la ioh pdiang haduh 36,362 tylli ki sos call haduh mynta ha kaba 477 tylli ki case la dep ban register, 158 kiba dang iaid bad 304 kiba la pynkut” ong u Myntri ka Tnad Social Welfare Bah Paul Lyngdoh haba jubab sha ki nongthoh khubor halor ka jingregister ka Meghalaya haduh 58% ki kam thombor ia ka longryngieng ki Kynthei ha Jylla.
“Ka jingmih ban pyntip kam da duna eh haba buh hakhmat ba ha ka Jylla kaba ngi kham buhrieh ia kiei kiei bad bym kwah ban sawa shabar ki saw kynroh ka Iing. Ka jingdon haduh 36,000 tylli ki call naduh ba buh ia ka Helpline ka pyni ba ka jingmih shakhmat ki kynthei ban pyntip ia ki kam thombor kala kiew bha” ula bynrap.
Nalor kane, u Myntri ula pyntip ba ka Sorkar kala rai ban wanrah ia u Women Helpline 181 bad Child Helpline 1098, ban pynthikna ia ka jingshakri ba khlem por ia ki jingjia shah thombor ki Khynnah bad ki Kynthei.
Halor ka bynta jong ki Dorbar Shnong, u Bah Paul ula ong “Ngi la shim ia ki Dorbar kum shibynta jong ka tnad Social Welfare bad don na kine ki phone call ki wan lyngba ka jingkyrshan jong ki Dorbar Shnong hi”.
