Kot 58% ka kam thombor pyrshah ia ka longryngieng ki Kynthei hapoh ka Jylla

Shillong, Naiwieng 27: Ka Meghalaya kala kot haduh 58 percent ha ka jingdon jong ki kam shah thombor ki Kynthei bad kane kala paw haka sngi plie iaka “NEYI CHETNA 2.0” National Gender Campaign bala pynlong daka Meghalaya State Rural Livelihoods Society (MSRLS) ha state central Library, Shillong.

Haba pynpaw ba donkam ban iakren halor ka jingjyllei ki kam shah iuhroit ka longryngieng ki kynthei, la pyntip ba ka 58% ki kam shah thombor ki kynthei kala paw haka Website jong ka Meghalaya Police kata naduh 2007 haduh 2022 bad la paw ruh ba ka jylla kala sakhi bun bha ki kam shah thombor ki khynnah hapoh ka Protection of Children from Sexual Offences Act, 2012 ne POCSO Act.

Kum shi bynta ban kyntiew iaki kynthei bad longkmie, ka Meghalaya kala pynkha haduh 45 hajar tylli ki Self-Help Groups (SHGs) haka ba 4 lak shiteng ki longkmie ki dei ki dkhot ha baroh kawei ka Jylla .

Ka kaiphod naka NFHS, ka pyni ba palat 77% ki longkmie kim kwah ban pyntip ne ujor ne iakren eiei haba iadei bad ka jingshah thombor.

Ka Nayi Chetna Campaign ka don iaka thong ban kyntiew iaka hok ki longkmie, ban pynshlur iaki ban im iaka jingim khlem kano kano ka jingsngew tieng ne syier mynsiem bad ban iada iaki na kino kino ki jingshah thombor.

Ia kane ka Campaign la plie haka 25 tarik mynta u bnai bad la pynlong ruh ia ka ha ki 34 tylli ki Jylla ka Ri bad haki UTs haduh ka 23 tarik Nohprah. Ia kane ka Campaign ba manla u snem yn ialam daka DAY-NRLM’s Self-Help Groups kaba don palat 9.8 klur ngut ki longkmie na kylleng ki shnong ka Ri kaba iaid ryngkat bad ka Jan Andolan.

Ha kane ka sngi ka Myntri ka tnat ka koit ka khiah ka Kong Ampareen Lyngdoh kala wan shim bynta bad kala kren halor ka jingshah thombor ki kynthei bad haka juh ka por kala kren halor ka jingdonkam ban iada iaka hok ki khynnah bad ki longkmie.

Ka kaiphod jong ka World Health Organization (WHO), ka kam ba 1 na ki 3 ngut ki longmie ki ngat haka jingshah thombor bad ka jingshah batbor haka jingim.

Ka Kong Ampareen kala pynpaw ba kane ka sngi ka long kaba kyrpang iaki longkmie bad kala ai khublei iaka NRLM kaba la wanrah kum kine ki programs ki ban ai mynsiem iaki longkmie ban ieng bad ban iakhun iala ka hok.

Haba pynpaw baka Jylla ka don shakhmat ban kyntiew iaki longkmie, kala ong ba ka jingdon ki program bapher bapher kiba ailad iaki longkmie ban don bynta lang kan iarap ban iakhun pyrshah iaki kam shah thombor.

Ha kane ka sngi, la wan shim bynta lang daka Deputy Commissioner, East Khasi Hills ka Kong R.M Kurbah, u Sampath Kumar, IAS, Principal Secretary & Development Commissioner, Community and Rural Development (C&RD), u Bah Ronald Kynta, Chief Operating Officer (COO) of Meghalaya State Rural Livelihoods Society (MSRLS), ki ophisar naka, ki Self-Help Groups (SHGs) Cluster Level Federation (CLF), Community Cadres, ki rangbah shnong bad kiwei kiwei de.

Ha kane ka sngi la sakhi ka jingrwai pdiang sngewbha naka Rimpei Village Organization, ka video halor ki khana shaphang ka jingshah thombor ki longkmie bad la pyni ruh iaki kam bha jong Cheanny D. Sangma bad Batskhem Lyngkhoi kiba iarap iaki lanot.

Ha kane ka sngi, la sakhi ruh ki jait jingshah na Jirang Block, ka jingshah pynkupburom ki Village Organizations (VOs), Cluster Level Federations (CLFs), Community Cadres, bad ki rangbah shnong kiba trei naka bynta ka bha ka miat ki longkmie.