Guwahati, Naiwieng 26 : Ka Sorkar Assam kala shim ia ka sienam ban iakren bad ki bahaiing hasem jong ki ehrang ka United Liberation Front of Asom (ULFA) na ka bynta ban iarap ia ki ha kaban lah wanrah noh iala ki khun ki kti sha ka jingim ba thymmai ha ka imlang sahlang.
“Ha kane ka sienjam, ka Sorkar kala khot sngewbha ia ki bahaiing ki dkhot ka ULFA sha ki ktem jong ki Pulit bad ki shipai lane ki Police Station ba kin ioh ia ka jingshaniah bad ban iarap ruh ia ki ba kin phah wanphai noh iala ki khun sha ka jingim ba thymmai” ong u GP Singh, DGP ka Assam.
Ula ong ba kane ka jingkhot sngewbha ia ki bahaiing ki ehrang ka ULFA ka dei tang naka bynta ban tei ia ka jingshaniah namar kane kan iarap bha ruh ha ka ban lah wanrah ia ka jingsuk hapoh ka thain.
“Da ka jingiakren bad ki bahaiing hasem, ka ai mynsiem ruh ia ki ehrang ka ULFA ba kin ioh ia ki jingiarap ha kaban wan phai noh sha ka imlang sahlang” ong u Singh.
U Myntri Rangbah ka Assam Himanta Biswa Sarma ha ka 16 tarik Naiwieng, ula ong ba ki don haduh 8756 ngut ki ehrang kaikhlaw na ki kynhun bapher bapher kiba la ioh jingiarap ha kylleng ka Jylla ha kine ki arsnem bala leit noh. Napdeng jong ki, haduh 4203 ngut ki dei jong ka National Democratic bad la bud da ki ehrang kaikhlaw ki Karbi ba kot 1926 ngut bad ki kynhun Adivasi ba kot 1182 ngut.
