Imphal, Naiwieng 26 : Shiphew ngut ki MLA riewlum ka Manipur kila iakynduh ia u Myntri Rangbah ka Mizoram Zoramthanga ha Aizawl bad kyrpad ba un tuklar lem ha kaban lah pynut noh ia ki kam iaumsnam ha Manipur.
U Nongialam ka Indigenous Tribal Leaders’ Forum (ITLF) Ginza Vualzong, ha ka sngi Saitjain u iathuh ba ha ka 29 tarik Naiwieng, kan don ka rally kaba heh bha jong ki paid Kuki-Zo kan long ha Mizoram, Tripura, Delhi, Karnataka bad Tamil Nadu nalor ki District bapher bapher ka Manipur.
U Zoramthanga uba dei u President ka Mizo National Front (MNF) ba synshar ia ka Jylla, ula ong ba ki MLA riewlum ka Manipur kynthup ki Myntri Sorkar, kila wan iakynduh ia u ha Aizawl myn ha ka sngi Palei bad kyrpad ba un iakren lem bad ki Nongialam Naga ha Manipur bad Nagaland halor ka jinglong jingman hapoh ka jylla Manipur.
Ula iathuh ba ki MLA ka Manipur kiba dei jong ka Jaidbynriew Kuki-Zo, ki kwah ban pynneh ia ka jingiadei bad kaba iajan bad ki paid Naga ha kum kane ka khep ba mih kikam iaumsnam ha Manipur.
“Nga la kyrpad ia ki MLA riewlum ka Manipur bad Myntri Sorkar ba kin leit iakren bad ka Sorkar Pdeng bad ban bteng ruh ha kaban pyntip sha ki ia kiei kiei kiba jia ha Manipur” ula ong.
Shiphew ngut ki KLA kynthup ia 7 ngut kiba dei na ka BJP, naduh ba khie ka thma iapher Jaidbynriew ha Manipur, kila dawa ban phiah noh ia ka bor synshar khadar la ka jong na ka bynta ki paid riewlum hapoh ka Jylla.
