Shillong, Naiwieng 21: Ka seng Hynniewtrep National Youth Front (HNYF) hynne ka sngi kala dawa na u Myntri ka tnat Pule Puthi Rakkam A Sangma ban khmih lem ia ki jingduna kiba bun hapoh ka skul Sib Sing Memorial Higher Secondary, Nongstoin West Khasi Hills.
Haba kren sha ki lad pathai khubor u Joint Secretary ka HNYF u Samla Phaskal Nongrum ula ong ba kane ka skul ka don hapdeng shibun ki jingduna la ka dei ha ki shuki, ka bording, ka kynroh, ka um bad ka madan nalor kiwei kiwei ki jingdonkam.
Ula iathuh ba naka liang ki nonghikai jong ka Sib Sing Memorial Higher Secondary School, Nongstoin West Khasi Hills ruh ki shem jingeh namar haduh mynta ym pat lah ban pyndon iaki kamra thymmai jong kane ka skul.
“Naka liang ka seng ka sngewkhia ia kane ka bynta bad kan nang iai buddien ha ka ban kyntiew iaka pule puthi hapoh ka District baroh kawei. Ngi dawa naka sorkar ba kan shim khia iaki jingdonkam hapoh ka Sib Sing Memorial Higher Secondary School”ong u samla Phaskal.
Haba kylli u samla Phaskal ula ong “Naka liang u Myntri ula kular ban shimkhia halor kane ban pynthikna ban pynbiang iaki jingdonkam hapoh ka Sib Sing Memorial Higher Secondary School”.
