Shillong, Naiwieng 21 : Ka Sorkar Jylla hynne ka sngi Ba-ar, kala rai ban khot ia ka jingialang bad baroh ki kynhun kynthup ki Nongsynshar Shnong, ban ai jingiada ia ki tyllong um ha Wahkdait, Laitkor bad ha Wah Umkhen.
Ia kane ka rai la shim ha ka jingialang bala pyniaid da u Myntri Rangbah ka Jylla Conrad K Sangma ha ka jingiadon ryngkat u Myntri ka Tnad PHE Marcuise N Marak bad u Myntri ka Tnad Water Resources Bah Comingone Ymbon.
Haba iakren bad ki nongthoh khubor, u Marcuise ula ong ia ka jingialang la pynlong ha ryngkat ka Tnad PHE, ka Tnad Water Resources bad ka Tnad Forest haba iadei bad ka Umkhen Water Supply Scheme bad ka jingiada iaka tyllong um ha Wahkdait bad Laitkor.
Ula pyntip ba u Myntri ka Water Resources ula dep pynlong ia ka jingleit jurip ia kine ki tyllong um dang shen bad shem ba kine ki tyllong um kila shah ktah na ka daw ka jingtih shyiap bad jingtih maw nalor kiwei kiwei.
“Ta ka daw u CM ula khot ia ka jingialang hynne ka sngi bad baroh ki Tnad..bad ha ka jingialang ngi la rai ban sa khot ia ki kynhun bapher bapher sha ka jingialang ha ka kyrdan jong ka Deputy Commissioner. Ka DC kan pynlong ia ka jingialang ia ki kynhun ba kynthup ia ki nongtih par maw bad par shyiap lem bad ki Rangbah Shnong jong kitei ki Shnong” ula ong.
“Kat kum ki kyndon jong ka Tnad Forest bad Water Resources, hap ban shim ia ki sienjam ban iada ia ki tyllong um bad ha ka jingialang ba nyngkong bad ki Kynhun bapher bapher lem bad ki Rangbah Shnong ngin sa iakren bad sa shim ia ka rai” ula bynrap.
