Shillong, Naiwieng 16: Ka sorkar Assam bad Meghalaya haduh mynta kim pat aiti ia ka jingtohkit sha ka Central Bureau of Investigation (CBI) halor ka jingshah siat ki riww paidbah kaba la jia ha ka shnong Mukroh myn ha ka 22 tarik u Naiwieng 2022.
Haba iakren bad ki nongthoh khubor u Myntri Rangbah ka jylla Conrad K Sangma ula ong, ban pyntreikam ia kum katei ka rai, hap ban iaid katkum ka lynti kaba baroh ar tylli ki jylla ki hap ban soi ia ka rai jong ka jingialang hapdeng ki Myntri Rangbah kaba la long ha ka 30 tarik u Nailur.
“Kumta katei ka kam kan donkam ia ka por namar tang da ka ktien, wat uwei u coma ruh ka lah ban pynkylla iaka jingmut jong ka rai jong ka jingialang bad kumta hap ban leh ha kata ka rukom kaba bniah bha” ula ong bad ka bynrap “Ka jingpyniaid ia ka kam kala sdang mynta bad baroh arngut ki Myntri Rangbah kila dep ban soi iaka rai jongka jingialang”.
U Myntri Rangbah ula ong ba ka jingialang kala rai ruh ban weng noh ia ki jingpynap pahara ha kylleng ki jaka khappud ha ki thain Khanduli.
“Ki don ruh kiwei pat ki bynta ha kaba ngi hap ban peit ban weng noh iaka jingphah ap pahara ha ki bor pulit da ki sorkar jylla ha kylleng ki jaka. Nga hap ban ong tangba ngam kwah ban batai lut khamtam ia ki jaka kiba kongsan, ia kaba sa shisien ngin iohi biang ba ka jingiakynad kansa hiar bha” ula ong.
U Conrad Sangma ula pyntip ba ula iakren bad u Myntri Rangbah ka Assam u Himanta Biswa Sarma ban ia rai na ka bynta ban leit jurip lang iaka thain Block I, Khanduli-Psiar bad ka jingslem ban leit jurip kadei namar ba ka don ka elekshon.
“Hadien ba la dep ka elekshon, ngi khmih lynti ba ngin leit jurip ia ka Khanduli-Psiar bad Block I hynrei ngim pat shim ia kano kano ka rai ha kaba iadei bad ka tarik” ula ong.
Ula iathuh ruh ba ki Regional Committee bapher bapher kila sdang ban pynkhreh iaka kaiphod ka jongki bad la khmih lynti ba kin aiti ia ka kaiphod hashwa ka 31 tarik u Nohprah.
“Hadien ba ngi la iatai sani bha bad ki committee bapher bapher, ngin sa shim ia ka rai,” la ong u Myntri Rangbah.
