Shillong, Naiwieng 16: U Myntri Rangbah ka jylla Conrad K Sangma ula ong, ba ka sorkar ka dang khmih bniah bha kumno ban pynbna ia ka Ktien Khasi bad Garo kum ki ‘Official Language’ ne ktien sorkar jong ka jylla Meghalaya namar ka jingeh kan mih ha kaba iadei bad ka jingthoh ia ki kot ki sla sorkar (file noting) .
Katei ka jingkren u Myntri Rangbah ka la mih halor ka jingdawa ka Hynniewtrep Achik National Movement (HANM) ba dei ban ithuh noh ia ka ktien Khasi bad Garo kum ki Official Language jongka jylla Meghalaya.
“Ka mat ban pynbna Official Language kan shong ka jingbatai bniah ia ka jingmut jongka kyntien ‘Official Language’ kumta ngi hap ban khmih bniah bha namar ba kin don ki jingeh kiba ngin iakynduh ha kaba iadei bad ka jingthoh ia ki kot ki sla (File Noting) ha ka kam sorkar.
“Lada ngi leh ha ka ktien Garo hato kane kan pynmih ne em ia ka jingeh bad kumno ngin leh ia kane…. lada jia ba u ophisar udei uba kren Khasi bad English bad yn ym lah ban sngewthuh, ngin mad jingeh ha ka kam shakri paidbah” ong u Myntri Rangbah ka jylla haba iakren bad ki nongthoh khubor.
“Lada kadei ka ‘Official Language’ kumno ngin weng ia katei ka jingeh bad lada ngim pyndonkam ia ka ktien Khasi bad Garo ha kane ka bynta hato kane kan pyndap pynbiang ia kata ka jingmut ‘Official’. Dei namar kane ngi hap ban khmih bniah bha halor kitei ki bynta baroh khnang ba ngin lah ban shim ia ka rai ban iaid shakhmat” ong u Myntri Rangbah.
Ula ong ba ka sorkar bad kum u Myntri Rangbah ka jylla u kwah ba ka ktien Khasi bad Garo kin long ki Official Language jong ka jylla hynrei kumno pat yn leh ia ka jingeh kaban mih lada ia ki jingthoh (File Noting) hap ban leh ha ka ktien Khasi bad Garo bad kumno ki ophisar kin leh halor katei ka bynta bad kane kadei tang kawei na ki nuksa, kumta ka sorkar kan hap ban khmih bniah bha bad ban shim ia ka rai.
