Mih paidbah ki ASHA ha ka rally ha Nongpoh
Nongpoh, Naiwieng 16 : Ki Nongialam ka Meghalaya ASHA Workers Union kila ther tyngeh ia ka jingkren ka Myntri ka Koit ka Khiah kong Ampareen Lyngdoh namar ka jingkyntait ban mynjur ba ki Nongtrei ASHA ki ioh ia ka jingsiew ba T.66 tyngka shisngi.
Kane ka jingkynthoh kala mih na ka President ka synjuk ka Kong Mary June Myrsing haba kren ha ka rally jong ki ASHA ka Ri-Bhoi District, kaba long hynne ka sngi Palei ha Nongpoh.
Kane ka Nongialam kala kynthoh jur ia ka Myntri halor ka jingkyntait ia ka jingkam ba ki Nongtrei ASHA ki ioh tang T.66 ka jingsiew ha ka shisngi ne ka Honorarium, da kaba iathuh pynban ba don ki ASHA kiba ioh ia ka jingsiew ba kot T. 32 hajar, T. 28 hajar bad T.18 hajar ha ka hynriew bnai.
Kane ka nongialam ki ASHA kala pynkynmaw ba ha ka jingiakynduh kaba nyngkong bad ka Myntri, ka Myntri kala pyntip ba kan sa iakynduh ia u Myntri Rangbah ban iakren halor ki jingeh ki ASHA hynrei “Lyngngoh pat ban iohi ha ki lad pathai khubor ba ka jingkren ka Kong Ampareen kala long kum ka wait prat niut bad kala pynlong ia ki Nongtrei ASHA kum ki jaka theh niut (dustbin) ha kaba baroh ki niut la theh lut ha ki ASHA”.
Haba pynpaw ba kum ka riewstad bad riewshai ym dei ban kren kum ki riewdum, ka kong Mary June kala ong “Hooid, haba sdang ia kane ka kam, ngi la sdang kum ki nongtrei monsngewbha hynrei kam shem la don pat kata ka jingiasoi soskular jong ki ASHA ba kin trei monsngewbha baroh shi jingim kumba la kam da ka Myntri”.
Lah ban pynkynmaw hangne, ki Nongtrei ASHA kila sangeh treikam hapoh ka Jylla halor ka jingmynthi ka Sorkar ban pyn treikam ia ki jingdawa ba kynthup ia ka jingpynkiew noh ia ka jingsiew jong ki n aka T.2000 sha ka T.5000 shibnai.
Ki Nongtrei ASHA kila dep pynlong ia kum kane ka rally ha West Khasi Hills, bad Ri-lum Jaintia shuwa ban hiar sha Ri-Bhoi.
