Shillong, Naiwieng 15: Ka Joint Action Committee (JAC) jong ka NEHUTA, NEHUNTA bad ka NEHUSU, kila mynjur ban leit sha ka miej iakren bala khot pynlong da u Vice Chancellor ka NEHU Prof PS Shukla, ka ban long ha ka 16 tarik Naiwieng.
“Ka JAC kala mynjur ban iakren bad u VC ha ka por 11:30 baje mynstep hynrei tad haduh da wai ka jingialang, ka jingiakhih ba khlem pud sngi, kan iai bteng” ong u Prof Lakhon Kma.
Lah ban kdew hangne ba ka jingiakhih khlem pud sngi bala khot da ka Joint Action Committee (JAC), kala neh mynta la lai sngi bad kala ktah jur ia ka jingiaid ki klass jongkii samla pule ka NEHU.
Lah ban kdew ba kane ka jingiakhih khlem pud sngi kaba la sdang naduh 13 tarik mynta u bnai halor ka jingpyrshah iaka jingleh mynthi u Vice Chancellor (VC) ka NEHU, ban wengkam ia u Rohit Prasad nalor kiwei ki jingdawa naki samla pule bad ki nonghikai ka NEHU.
“Ka JAC kan kynduh ia u VC bad hadien ka jingialang ka JAC kan pynlong iaka jingialang jong ka Committee ha bar ka ophis treikam u VC naka bynta ban pynsngew ia kaei kaba mih naka jingiakren bad u VC bad haka juh ka por ban shim da kiwei ki sienjam, lada ka jingiakren kam long kaba seisoh” la pyntip u prof Lakhon.
