Jowai, Naiwieng 14 : U Myntri ka Tnad Cooperation Bah Comingone Ymbon, ula pynshlur ia ki Longkmie bad ki samla wad kam wadjam ba kin ym pynleit jingmut shuh ha ka jingiohkam Sorkar hynrei ban pyrshang ha kaban seng la ka jong ka ban ieng hala ki kjat.
U Myntri ula kren ia kane haba plie ia ka jingrakhe All India Cooperative Week ba 70th ha Moosyiem Shangpung, West Jaintia Hills, kaba la pynlong halor ka matpdeng “Role of Cooperative Marketing India a five trillion Dollar Economy and Sustainable Development Goals”.
Ia kane ka jingrakhe la pynlong da ka Tnad Cooperation ha ryngkat ka jingiatreilang bad ka Meghalaya Cooperative Apex Bank Ltd bad Rural Finance, Shillong lem bad ka Meghalaya Livelihoods bad Access to Markets Projects (Megha-LAMP)Meghalaya Basin Management Agency (MBMA).
Haba ai jingkren, u Myntri ula ban jur halor ka jingkongsan ban pynkhlain ia ka jingiasengkam lajong hapdeng ki para nongshongshnong ban kyntiew iala ka ioh ka kot.
Ula pynshlur ia ki dkhot jong ki Cooperative Society ba kin aiti ialade ha kaban pyntreikam bha ia ki project ka Sorkar haba banjur ia ka jingdonkam ban phaikhmat noh sha ka sengkam sengjam lajong.
Ula pynkynmaw ia ka jingialang halor ka CM-Elevate ba dang shu pyllait shen da ka Sorkar, ha kaba ki briew ba kwah ban sengkam sengjam lajong, ki lah ban aplai ia ka skhim ha kaban kyntiew ia ki kam jngohkai, ka rep ka riang, ki kam pynbyr ngia bad kiwei kiwei.
Kiba la iadonlang ha kane ka sngi ki kynthup ia u Bah W K Kharbuli, Additional Deputy Commissioner, West Jaintia Hills, kong R C Sohkhlet Registrar Cooperative Societies, MD Meghalaya Cooperative Apex Bank, ki Ophisar na ka tnad Cooperation, Megha- LAMP, MBMA bad Meghalaya Cooperative Apex Bank Ltd.
