Shillong, Naiwieng 13 : Ka rynsan kala biang pura ia ka Jylla Meghalaya ba kan pynlong ia ka Tamasa Shillong Cherry Blossom 2023 bad wat ki surok bad ki lynti iaid jong kane ka Nongbah, kila kup ia ki rong pink bad rong lieh jong ki syntiew dieng cherry kiba la phuh ha kat shaba iaid.
Ki nongshangkai pyrthei na ka Ri bad nabar ri ruh kumjuh kila phaikhat biang sa shisien sha kane ka tamasa lehkmen jong ka Jylla bad ka mariang lem bad ka kolshor bad ka put ka tem ha ryngkat bad ki kyrteng ba pawnam ha ka karkhana ka put ka tem (music industry) jong ka pyrthei.
Ha ka jingiakren bad ki lad pathai khubor dang shen, u Myntri ka Tnad Jngohkai Bah Paul Lyngdoh ula ong “Kin don haduh 30,000 ngut ki nongwan kai sha kane ka tamasa manla ka sngi kaba pyni ba haduh ba kut jong kane ka tamasa, kin kot haduh ka shi lak ngut. Haduh 90% na kine ki nongwankai la khmih lynti ba kin dei ki nongshongkai kiba nabar, kynthup kiba napoh ka ti bad na bar ri ruh kumjuh”.
Kane ka tamasa kan don ia shibun ki jingpyn byrngia naduh ki jingiakop bapher bapher ba kynthup ia ki jingiakop thei bhabriew, ka jingiakop rwai choir, iadro dur, iakop rwai karaoke, ka ferris wheel bad kiwei kiwei. Ia kane ka tamasa yn pynlong ha madan Kurkalong, Bhoirymbong, Ri-Bhoi District naduh ka 17 tarik Naiwieng haduh ka 19 tarik Naiwieng.
Ha kane ka kynti, ka aktress ka Bollywood Nora Fatehi kan wan ban iadonlang ha kane ka tamasa ban peit dala ki jong ki khmat ia u nongrwai ba pawnam na America u Ne-yo u ban rwai ruh ia ka jingrwai ba pawnam jong u kaba ai kyrteng“Let me Love you”.
Ki duhalia ki ban kiew ha ka rynsan ha ka sngi sdang jong ka tamasa kata ha ka 17 tarik ki kynthup ia– Sanam, Hybrid Theory, SURL, Kenny Musik, 4th Element, The Band Phantasm, DBRYN, Gwyneth, Dalariti, CYCO, Aminio, Dr Legend, Chevinia.
Ki duhali kiban pynshongshit ia u paidbah ha ka sngi ba-ar ki kynthup ia u NE-YO, Meba Ofilia, Pink Panda, Snow White, Rahul Rajkhowa, Street Stories – Banjop, Empirical Tribe – Tenny, Zethan, Ricaa Stella, Banker Kharkongor.
Ka sngi ba khatduh kan sakhi ia ka jingkiew rynsan jong u nongrwai barim ka Boyzone Ronan Keating, Jonas Blue, Lou Majaw, Blue Temptation, Da Minot, Nokpante, Rhem, Favian, Wanjop Sohkhlet, Banrap, Youngg Nate, Meban, Lamphrang, Toshan.
