Guwahati, Naiwieng 13 : Haduh khyndai tylli ki kynhun kiengatiar jong ka Jaidbynriew Meitei na Manipur, kila shah khein be-ain ha ka Sorkar Pdeng, ka ban treikam haduh san snem pura.
Ha ka 13 tarik Naiwieng, ka Ministry of Home Affairs (MHA), kala pynbna ia khyndiat tylli ki kynhun kiengatiar ki Meitei kum ki kynhun ba be-ain.
Kat kum ka jingpynbna, kine ki khyndai tylli ki kynhun la khein beain halor ka jingkynnoh ba ki leh ia ki kam kiba ktah ia ka jingialong kawei bad ka jingiatylli jong ka Ri India.
Ia kine ki kynhun la pynbna beain ban tehlakam ia ka jingkwah pynpait ia ka Ri, ki kam kaikhlaw bad ki kam iaumsnam.
Kine ki kynhun Meitei bala khein beain ki dei ka ‘Ka Peoples’ Liberation Army (PLA) bad ka political wing jong ka, ka Revolutionary Peoples’ Front (RPF), ka United National Liberation Front (UNLF) bad ka armed wing, ka Manipur Peoples’ Army (MPA), ka Peoples’ Revolutionary Party of Kangleipak (PREPAK) bad ka armed wing, ka ‘Red Army’, ka Kangleipak Communist Party (KCP) bad ka armed wing bala tip lang kum ka ‘Red Army’, ka Kanglei Yaol Kanba Lup (KYKL), kaCoordination Committee (CorCom) bad ka Alliance for Socialist Unity Kangleipak (ASUK) nalor ki kynhun ba pait na kine ki kynhun.
Ka Sorkar Pdeng kala kdew ruh ba kine ki kynhun ki don ia ka jingthmu bad ka thong ban iakhun ban ioh noh iala ka jong ka ri da kaba weng noh ia ka Manipur na India lyngba ka thma kiengatiar bad ban kynshoit ia ki trai rielwum ka Manipur ba kin iakhun lang ban ioh ia ka jinglaitluid.
