Shillong, Naiwieng 10: Kum ki trai riewlum ka thain Shathei Lam Mihngi (North East India), ngi don ki nongshun ban ialeh pyrshah. Kam bha ba ngin ia bam para ma ngi ne ban iashoh para ma ngi. Kane ka jingia shun para ma ngi, ka long kumba ngi shim hi iala ka jingim (Suicidal).
Ia kine ki kyntien la ong da u President ka Hynniewtrep National Youth Front (HNYF) u Bah Sadon Blah haba kren haka jingialang sngewlem halor ka jingjia iaumsnam hapdeng ki jaidbynriew Kuki bad Meitei ha Manipur kaba la neh mynta la palat 7 bnai.
Haba ai jingkren ha kane ka jingialang, u Bah Sadon ula ong ba katkum ki sakhi, iaka Jylla Manipur mynta ka kynti la phiah ar bynta bad kata kadei haka jingmut jingpyrkhat lane ka jingiasngew pher para jaidbynriew.
Ula ong ba kum kine ki jingiakajai kala ju jia teng hapoh ka Jylla Manipur ha ki snem bala dep hynrei kim neh slem namar ka sorkar pdeng bad ka sorkar jylla kila kloi ban shim daki sienjam ba tyngeh ban wanrah biang iaka jingsuk hapoh ka Jylla.
“Hynrei kumba ioh mynta, kane ka jingia umsnam kala neh palat 7 bnai bad lah ban ong ba naka liang ka sorkar pdeng bad sorkar jylla, kila shim sting palat ban tem iaka jingiaumsnam bad kane ka kdew shai ba ki don kiba ialeh Politiks ban ioh jingmyntoi na kane ka jingiaumsnam” ula ong kynnoh.
U Bah Sadon ula ong ba kum u nongialam ka HNYF, u ieng ban pynrem jur iaka jingshah thombor ki kynthei kaba la saphriang haki rynsan Social Media bad ka jingshah ieh khunswet ki khynnah hadien ba mih ka jingia umsnam ha Manipur.
“Ka jingia umsnam haka imlang sahlang ka long shngain iaki khynnah bad iaki samla ban tei iala ka lawei ba phyrnai bad ka imlang sahlang kaba ia umsnam da lei lei ruh kam long shngain iaka hok bad ka burom ki kynthei” ula ong.
“Kum ki briew kiba don ha jngai naka Manipur, ngi sngew ba kane ka jingia umsnam ha Manipur ka lah ban don eiei sha lyndet namar khlem da don kiba kyrshan ne kynshoit iaka jingia um snam, kane ka jingjia kam lah ban neh daki bun bun bnai” la ong u Bah Sadon.
U Bah Sadon ula ong “Nga kyntu iaki jaidbynriew ka thain shathei lam mihngi (North East), nga kyntu iaki jaidbynriew Kuki bad Meitei ban wan shakmat ban iakren halor ki jingia sngewpher jingmut bad nga kyntu iaka sorkar pdeng bad ka sorkar Manipur ban shim ki sienjam ban wanrah noh iaka shong suk shong sngain hapoh ka Jylla”.
