Nongpoh, Naiwieng 08 : Ka Confederation of Ri-Bhoi People (CoRP) ha ka sngi Balang, kala ujor sha u Deputy Commissioner ka District, pyrshah ia ka kam pyniap pathar ia ki dohum dohwah ha ki wah kiba don hapoh ka Ri-Bhoi District.
Ka CoRP bala lamkhmat da u President Bandari Ryntathiang, kila buh ia kane ka jingujor namar ka jingjurpalat ka jingsiat bomb ha ki wah ba kynthp ha ka Wah Bora Umlapong bad ka Wah Thwei KSih kiba hap ha ka Wah Umsiang.
Kat kum ka jingong jong u, kane ka jingleh kine ki riew rhah kala wanrah ia ka jingiap pathar jong ki dohum dohwah ha kitei ki wah.
Haba kren sha ki nongthoh khubor, u Bah Bandari u iathuh ba ka seng kala ioh pdiang ia ki jingujor halor ka jingdon kine ki riewrhah ba pynjot ia ka wah bad halor kane, kala shim ia ka sienjam ban ujor ia ki katto katne ngut ki briew kiba ka seng kala ioh jingtip halor ka jingdonkti jong ki.
“Ngi tip ba ki bor pyniaid district khamtam ki tnad ba dei khmih ia ki jait mrad bapher bapher, ki ju pynmih ia ki jingmaham man ka por lyngba ka 144 CrPC ban khang pyrshah ia ka jingpyniap pathar ia ki mrad ki mreng bad ki dohum dohwah, hynrei la sakhi ba ia kine ki kyndon ain ym don satia ki riew paidbah kiba burom ne bud thik tad haduh kine ki sngi namar ka jingiai mih ki riew shimkabu kiba ju pyniap pathar ia ki mrad ki mreng bad ki dohum khlem da pyrkhat ia ka lawei kaban sa wan”, ong u Bah Ryntathiang.
Kumba haba ioh jingtip ia ka jingdon jong ki riew shimkabu ban siat bom pathar ha kitei ki wah, ka seng ka la ujor syndon pyrshah ia kine ki briew ha ka ophis u Deputy Commissioner haba kyntu ruh ia ki bor pyniaid district ba kin shim ia ki lad ki lynti ba tyngeh ban tohkit halor kane ka jingsiat bom ha ki wah ki duid bad ban pynshitom ia kiba donkti.
