Aizawl, Naiwieng 08: Palat 75% ki briew kila iamih ban iathep vote ban jied ia ki 40 ngut ki MLA ba thymmai jong ka Iing Dorbar Thaw Ain ka Mizoram ha ka sngi Ba-ar.
Ka jingiathep vote kala iaid beit iaid ryntih ha Mizoram khlem kano kano ka jingjia ka ban pynthut.
Kane ka jingpoi ki nongthep vote ka lah ban nang kiew namar ki don katto katne ki Polling Station kiba ka jingiathep vote kala iaid tad haduh ka por 9 baje mynmiet namar ka jingthut jong ki kor EVM.
Ka ECI kala pynpaw ia ka jingkhmih lynti ba ka jingpoiki nongthep vote ka lah ban kot ia ka 80% tm.
Ha Mizoram, palat 80% ki nongthep vote kila iathep vote ha ki elekshon bala leit noh. Ha u 2013, kiba poi thep vote kala kot ia ka 80.82% katba ha ka elekshon 2018 kala kot ia ka 80.03 %.
Na ki 11 tylli ki District,k Serchhip District jongka Central Mizoram ka dei kaba poi bun eh ki nongthep vote, kaba la kot ia ka 84.78%, bud sa ka Mamit District kaba kot 84.23% bad ka Hnahthial District kaba kot 84.16%.
Ka Aizawl District ka dei kaba poi duna eh ki nongthep vote kaba long tang 73.37%, bud sa ka Siaha District kaba kot 76.26% bad ka Saitual District kaba kot 76.85%.
Napdeng ki 1276 tylli ki Polling Station, 95 tylli ki deikiba pyniaid da ki Kynthei bad 11 tylli kiba pyniaid da ki briew kiba don jingduna ha ki dkhot met.
Ka ECI kala buh ruh haduh 40 tylli ki model polling station ha ki 11 tylli ki District kiba la pynbiang lut ia baroh ki jingdonkam.
