Shillong, Risaw 27 : U Myntri ka Pule Puthi u Rakkam A Sangma hynne ka sngi Thohdieng ula pyntip ba ka Sorkar jylla shen kan sa shim ia ka rai la kan pdiang ne em ban pynlong ia ka Mathematics kum ka compulsory subject ne ka sobjek kaba kongsan ha ki skul.
Haba iakren bad ki nongthoh khubor, u Rakkam Sangma ula ong ba ka jingialang kaba la long bad ki Principal na palat 30-40 tylli ki secondary bad higher secondary school kila iatai sani halor katei ka mat.
Ula ong, kiba bun ki Principal kila pynpaw ia ka jingsngewkhia halor ki jingmih na ka jingai jinghikai bad kila ai jingmut ba dei ban pynkylla noh ia ki katto katne ki kot skul khang ba ki skul kin long lang kumjuh bad ka National Standard.
“Kiba bun ki pynpaw ba dei ban pynlong noh ia ka Mathematics kum ka compulsory Subject, hynrei ia mynta hi, ka sorkar kan sa shong pyrkhat ia ki jingai jingmut jong ki Principal.Nga ruh nalade shimet nga sngew bad bun ki Academicians bad ki Principal kila ai jingmut ba ia ka mathematic ym dei shuh ban pynlong kum ka Optional Paper…ia mynta kadei ka “Best of Five” na ki 6 tylli ki subject. Kumta ka sorkar kan sa shim ia ka rai hadien ba kala dep ban khmih bniah bha” ong u Rakkam.
U Myntri ka pule puthi ula ong ba 90% na ki khynnah ki khynnah pule kin ym shim iaka mathematics lada ki iohlad.
“Lada ngi ailad baroh kin kwah ban don ha ka jaka kaba suk bad kaba aram. Ia nga shimet hi, lada ngi ailad ba ka Mathematics kan dei ka Optional Paper, bun ki khynnah kin ym shim ia kane ka subjek, kane kan long kaba la thikna hynrei mynta ha kane ka juk kaba mynta, kaba leit pule ha ki kyrdan kiba heh khlem ka mathematics kan long kaei kaei kaba lah ban pdiang hynrei nga tharai ba nginlah ban pynkhreh bha, ngi don ia kajuh ka jabieng bad kiwei pat kiba don ha kane ka sla pyrthei bad nga tharai kala poi ka por ba ngin khmih bniah bad ban shim ia ka rai” ong u Myntru ka pule puthi.
Ula pyntip ba ka tnad kala bthah iaka Directorate of Educational Research and Training (DERT) ban leh ia ka jingwad bniah halor ka jingleh bha ki khynnah pule hashwa ban pynlong iaka Mathematics kum ka Optional Paper.
“(Ngi kwah ban tip) haduh katno ngut ki khynnah kila leh bha ha ka mathematics (shwa ban pynlong ia ka kum ka Optional Paper) bad katno ngut ki khynnah ki shym la shim ia ka mathematics. Ngin sa ioh ia ki jingtip bad ki jingkheiñ baroh bad ngi la kyrpad ia ka Meghalaya Board of School Education (MBOSE) bad ka DERT ba kan ai ia ki jingtip khnang ba ngin ioh ia ki jingtip kiba pura bad ban sngewthuh khambha halor kane ka mat” ula ong.
