Shillong Risaw 26: Ka Hynniewtrep Youth Council (HYC), West Khasi Hills hynne ka sngi Palei kala dawa iaka Khasi Hills Autonomous District Council ba kam dei shuh ban ai ne pynthymmai iaka Trading License jong ki bar jylla ha thaiñ Shallang kaba la dap da ki nongkhaii bar jylla.
Ia katei la dawa da u President ka HYC-WKH u bah Lumlang Kharsyiemlieh lyngba ka dorkhas bala aiti ha u Chief Executive Member (CEM) ka KHADC bah Pyniaid Sing Syiem.
Ka HYC kala pynpaw ia ka jingsngewdiaw ba ki don kumba 70 na ka 100 ki bar jylla kiba khaïï pateng ha katei ka thain bad kane kala ktah jur ia ki trai ri trai muluk ban leh ia ki kam khaïï pateng.
U Bah Lumlang ula ong ba ha West Khasi Hills, dei tang ka ïew Shallang kaba la shah knieh noh ka kkhaïï pateng ha ki bar jylla bad kumta kila kyntu ba ka KHADC ba kam dei shuh ban ai ne ban pynthymmai biang ia ka Trading License jongki bar jylla kiba don ha katei ka thaiñ.
Ula ong ruh ba katkum ka ‘The Administration of Nongstoin Syiemship, Rules, 2006’, la kdew shai ba ka Hima ka khang pyrshah ia ki bar jylla ban trei ban ktah hapoh ka Hima Nongstoin.
Ula iathuh ba na ka liang u CEM ula kular ba yn sa shimkhia ia katei ka jingdawa ba yn sa bthah iaka Hima Nongstoin ba kam dei shuh ban ai NOC shuh sha ki bar jylla.
Ka HYC-WKH, kala pynpaw ba ka KHADC, ka pynshlur tang ia riewshimet bad ia ki hima ban thung dieng katba ka KHADC kam shym la leh eiei pat ha ka jaka ka jongka kaba don ha Athiabari ia kaba u CEM ula kular ba lyngba ka Social Forestry Wing jongka KHADC yn sa shimkhia haba iadei bad katei ka mat.
Nalor kane kila dawa ruh ba ka KHADC kadei ban peit ia ka khyndew ka Shyiap ha ka thain West Khasi Hills bad ban pynkhlain ia ka roi ka par bad ia ka khaii pateng ha ki Iew ba don ha ki jaka khappud.
Ha kajuh ka por, kala dawa ia u CEM ba ka KHADC ba un bthah ia ki Hima bad ki Shnong ba kim dei ban ai NOC katba mon ia ki bar jylla ba kin ioh trei ia ka kam Post Gramin Bak Sevak ha ka Post Office.
