Shilling, Oct 17: Ka jylla Meghalaya kala shah pynliem da 9 wicket ha ka jylla Mumbai haka jingiakhun ia ka Syed Mushtaq Ali Trophy T20 Tournament kaba la long hynne ka sngi Baar ha Jaipur.
Ka Meghalaya kaba la iakhun pyrshah ia ka Mumbai kaba don ia ki rangialehkai Cricket kiba mihkhmat iaka ri bad ha ka Indian Premier League, kala kamai tang 65 run, hap 9 wicket ha ka 20 Over katba ka Mumbai kala jop da kaba hap tang 1 wicket bad pyndep tang hapoh ka 9.4 over.
U Tushar Deshpande ka Mumbai ula ioh 3 wicket bad ai 8 run bad une u rangialehkai udei uba ialehkai dang shen na ka kynhun Chennai Super Kings ha ka IPL.
Ka Meghalaya kala kamai 27 Run bad hap 7 wicket, hynrei da ka jingneh slem u Anish Charak bad u Akash K Choudhury kila ioh kamai 23 run, ha kaba u Charak ula kamai 20 run khlem Out bad u Choudhury ula ioh 11 run.
U nongtied ka Mumbai u Yashasvi Jaiswal uba mih iaka ri India ula ioh 21 run, u Angkrish Raghuvanshi ula ioh 32 run khlem out.
U Jaiswal ula shah pyn out ha u nongkawang bol ka Meghalaya u Rajesh Bishnoi bad hadien kane la mih sa u Ajinkya Rahane u nongialehkai uba mihkhmat ia ka ri India ha kaba ula kamai 8 run khlem out.
Ka Meghalaya kala mad iaka jingrem ha baroh arsien ki jingiakhun bad ha ka nsgi Palei kan iakhun pyrshah ia ka jylla Mizoram.
