Mih ka kyrteng u Nongialam ka HYC bad 2 ki MLA barim ban iakhun elekshon Lok Sabha na ka UDP

Ap ka HSPDP ban iashimrai lang bad ka UDP ha ka RDA

Shillong, Risaw 17 : Lai tylli ki kyrteng ba kynthup ia u Nongialam ka seng Hynniewtrep Youth Council (HYC) bad arngut ki MLA barim, kila paw ha ka thup ki nongkwah iakhun ia ka elekshon Lok Sabha-2024 na ka United Democratic Party (UDP), na Shillong Parliamentary Seat.

Une u Nongialam ka HYC u dei u President bala shongthait noh Bah Robertjune Kharjahrin bad ki arngut ki MLA barim pat ki dei u Bah Process T Sawkmie bad u Bah Jemino Mawthoh, General Secretary ka UDP.

Kat kum ka khubor na ki Nongialam ka UDP (ki bym kwah pynpaw kyrteng), la iathuh ba kine ki laingut kila pynpaw ia ka jingkwah ia ka ticket na ka UDP hynrei ka party kam pat rai satia iano ban ai.

Lah ban kdew hangne ba u Bah Robertjune Kharjahrin ula shongthait noh na ka jingtreikam kum u Nongialam ka seng HYC hynrei u dang bat pat kum u Chief Adviser kane ka Seng.

Kumjuh ruh, u President ka seng Hill State Peoples Democratic Party (HSPDP) Bah KP Pangniang ula pyntip ba ki don bun ki briew ba kwah iakhun ia ka elekshon Lok Sabha 2024 kiba la wan iakren bad ka seng ban ioh ticket hynrei ka seng kam pat shim rai satia.

U ong ba ka HSPDP hi kan ap ia ka paralok seng riewlum (UDP) ban iakren ia kane ka kam hapoh ka Regional Democratic Alliance (RDA).