Nongpoh, Risaw 17: Ka ophis jong ka Meghalaya AIDS Control Society Shillong ha ryngkat ka ophis u Deputy Commissioner, Ri Bhoi District mynta ka sngi ka la ioh ban plie ia ka prokram ai jingsumar ei sha ki paidbah kaba la tip kum ka ‘Integrated Health Camp’ ha ka shnong Iewmawlong, hajan Nongpoh.
La wan plie ia kane ka prokram ban khmih ia ki jait jingpang bapher bapher da u Bah Mayral Born Syiem, MLA ka Nongpoh u ba dei ruh u Chairman ka Meghalaya State Health Advisory Board kum u kongsan ha ka jingiadonlang ruh u Bah R. Brahma, Additional Deputy Commissioner, ka Dr. B. Decruse Project Director ka Meghalaya AIDS Control Society bad ka Dr T. Momin DM&HO, Nongpoh.
Nalor ki ophisar, la shimbynta ruh da ki Doctor ki Nurse bad ki nongtrei ka tnad ka Koit ka Khiah ban khmih ia ki jingpang bapher bapher jong ki paidbah kynthup ruh ki khynnah skul, kolej bad ki nongshong shnong ka Iewmawlong.
Na ka liang ka Dr. B.Decruse, Project Director, ka la pyntip, ba ka jingthmu ba kongsan jong kane ka Integrated Health Camp da kaba ia treilang bad ki tnat treikam sorkar bapher bapher, ka long ban pynsngewthuh paidbah halor ka jingkordor jong ka koit ka khiah ba kin wan shakhmat ban phah khmih ia ki jingpang naduh ka HIV, AIDS, TB, Non-communicable diseases, jingpang khmat, ki jingpang ba mih na ka jingdih duma bad kiwei kiwei.
Ka la iathuh ruh, ba ia kane ka prokram kaban neh kumba 20 sngi ei yn pynlong ha kylleng ki shnong jong ka Ri Bhoi District ha kaba yn don kumba 66 tylli ki camp ban pynioh ia ka lad ia ki nongshong shnong ba kin wan shakhmat ban phah khmih ia ka jinglong jingman ka koit ka khiah ka jong ki.
La iathuh ruh ba ha kane ka camp yn don ruh ka jingpynrung kyrteng na ka bynta ka Aadhaar card bad ka MHIS, ha kaba na ka liang ka tnad ka Koit ka Khiah kan pynthikna ruh ba ki paidbah kin wan shakhmat ban shim ia kum kane ka kabu ba la wanrah da ka sorkar jylla.
Haba kren pat kum u kongsan, u Bah Mayralborn Syiem MLA, u la pynpaw ia ka jingsngewhun ban sakhi ba ki bor ka sorkar jylla ki la nang shimkhia ban pynbit pynbiang ia shibun ki bynta ba kongsan khamtam ia ka tnad ka Koit ka Khiah bad ka Pule ka Puthi kiban ai jingmyntoi pat ia ki paidbah nongshong shnong ka jylla hi baroh kawei.
