Tura, Risaw 14: Kawei ka Shrieh Hulieng ne Hoolock Gibbon, kaba dei ka mrad kaba don hapdeng ka jingma ban duhjait noh, kala iap noh hadien ba kala shah bat ha ka bording elektrik ha ka thaiñ Gandrak Dare, Tura hynne ka sngi Saitjain.
La lap ba ka daw jong ka jingiap katei ka shrieh Hulieng kadei namar ka jingshah bat ha ki sainar elektrik bad kane kadei ka sien ka baar jongka jingiap kine ki mrad kiba la jan duhjait ha Tura ha kine ki 2 snem kiba la leit.
La iathuh ba kane ka shrieh kala hiar sha them jong ka Tura Peak hadien ba kala dep ban shang ha kylleng lyngba ki dieng kiba don ha katei ka jaka kaba don hajan ka Kshaid Gandrak.
Ka jingiap kane ka shrieh kadei na ka jingioh bat ia uwei u sainar elektrik ha ka por ba ka dang shang ha katei ka jaka bad kane ka shrieh kaba la iap ka don ia ka jingkhia kaba 6 Kg, la pyntip ki heh jong ka tnad Wildlife kiba la leit shim ia katei ka shrieh kaba la iap.
Ki jingkynnoh kiba bun kila mih pyrshah ia ka MEPDCL ha kaba iadei bad ka jingiaid ki sainar elektrik hynrei ym shim la don kiban shimkhia.
La iathuh ba bun kila ujor pyrshah ia ka Meghalaya Power distribution Corporation Limited bad MeECL kaba kynthup na ki nongshong shnong jongka Upper Chandmari bad na ka tnad Wildlife, kiba la pynpaw ia ka jingma ia ka rukom pyniaid ia ki sainar elektrik hynrei ki bor kiba dei khmih kila kyntait ban leh eiei ne ban pynbeit ia katei ka jingduna.
“Ngi la ujor ia kitei ki sainar elektrik bad ngi la kyrpad ia ka MeECL la bunsien ban leh ia kaba donkam namar ba ki hap ha ka lynti ba iaid ki shrieh Hulieng” la pyntip
u Wildlife Divisional Forest Officer u Rupankar Marak.
