Shillong, Risaw 13 : Ka Laban Puja Committee, kala mynjur ban nym pynieng puja pandal ne ki decoration ha ki surok ka tnad PWD ha ka thain Laban namar ka jingujor pyrshah da ka Khasi Students Union (KSU) Laban Circle.
Kane ka rai kala mih na ka jingialang bala lum da ka Additional Deputy Commissioner ba khmih ia ka Laban Kong D Kharshiing hynne ka sngi Thohdieng ha Laban Police Station, kaba la wan iashimbynta da ka Central Puja Committee, ka Laban Puja Committee, ka Dorbar Shnong Laban, ki heh ka tnad PWD, u Officer in-Charge ka Laban Police Station lem bad ki Nongialam ka KSU Laban Circle bala lamkhmat da u President Reuben Najiar bad General Secretary Jason Laloo.
Lah ban kdew hangne, ka KSU-Laban ha ka 9 tarik Risaw, kala ai da ka dorkhas sha u Chief Engineer ka Tnad PWD (Roads) ba pynpaw ia ka jingpyrshah ban tei pandal ha ka jingleh niam puja ha surok ba dei peit ka PWD namar ka jingwanrah ia ka jingkhapngiah, jingdheng kali bad ka jingbym sngewtynnad ia ki briew ban iaid lyngba ki bym dei na ka niam Hindu.
Kat kum ka kyrwoh, ka KSU Laban Circle kala pynshai ia ki nongrim jong ka ban pyrshah ia ka jingshna pandal ha kane ka jingialang.
La iathuh ba ka Laban Puja Committee kala mynjur ia ka jingai jingmut ka seng ban nym shna pyndak shuh ha ki surok haba kular ruh ban pynbun ia ki volunteer ki ban peit ba ka jingleh niam kan ym pynkhapngiah ia ki surok bad ki lynti syngkien nalor ban khmih ruh ba ka jingleh niam kan iaid beit iaid ryntih khlem pynthut iano iano ruh.
Ha kajuh ka por, ka KSU-Laban kala buh ruh ia ka jingmahan ia ki Nongialam ka Puja Committee ba ki dei ban peit ia ka jingkhuid jingsuba, ba kin ym dei ban bret pathar ia ki niut ha sruok bad ha shnong ha thaw, ba kim dei ban pynheh jingrwai palat ia ka por bala buh da ka Ophis ka Deputy Commissioner.
Nalor kane, la bthah ruh ba kin pynthikna ba ki nongwan lehniam kim dei ban dih buaid bad pynmih ia ka huri hura hapoh ki shnong ki thaw ha ka por leh puja.
