Shillong Risaw 12: U Myntri ka tnad Jngohkai u Bah Paul Lyngdoh hynne ka sngi Palei ula ong, ba ka jylla Meghalaya ha ka sien kaba nyngkong eh kan pynlong ia ka International Tourism Mart kaba 3 sngi ha u Naiwieng 2023.
“Ka Ministry of Tourism kala pynlong ia ka International Tourism Mart (ITM) ha kylleng ki jylla kiba don ha ka thaiñ shatei lam mihngi naduh u snem 2013 bad mynta u snem ia kane ka ITM-XI, yn pynlong naduh ka 21 haduh 23 tarik u Naiwieng 2023 ha nongbah Shillong” la pynbna u Bah Paul Lyngdoh.
Ula ong, ba ha katei ka tamasa kaba 3 sngi, yn pyni nam ia ki jingdro bad ki jingthaiñ bad ki jingshna da ki kti, Tour Operator, Hoteliers, ki nongpyniaid ia ki Homestay ha kaba kin don ki jingialang bad ki jingiakynduh kiba markhmat.
U Bah Paul ula khmih lynti ba lyngba kane ka ITM kan don ka jingwan iashimbynta na ki jylla ka thaiñshatei lam mihngi bad ia kane ka tamasa yn wan ban plie da u Myntri ka Sorkar Pdeng uba khmih iaka kam jngohkai u GK Reddy.
Ula ong ba kane ka tamasa ka long kaba kongsan khamtam ba kadei ruh ka sien kaba nyngkong eh iaka nongbah Shillong ban pynlong iaka International Tourism Mart bad ia kane ka tamasa yn pynlong ha Lairiti Centre kaba don ha New Shillong Township khnang ba kan ym pynmih ia ka jingdheng kali ha ka nongbah Shillong ha ka por ba don kane ka tamasa.
