Shillong, Oct 12: Ka jylla Meghalaya kaba hap ha ka Seismic Zone – V ne ka jaka kaba ju khie jur bha u Jumai, kala shim ia ka sienjam ha ka ban pynkhreh bha ialade na ka jingwan u lynshop biang u jumai uba jur kumba jia ha u snem 1897, da kaba pynlong ia ki mock drill ha baroh ki 12 tylli ki District ka Jylla.
Man ki District jong ka Jylla kila ithuh haduh 5 tylli ki jaka ban pynlong ia kane ka mock drill, kaba long ruh kum ka jingai jinghikai ia ki kynhun ai jingiarap ba kumno kin leh bad kiei ki kam ba ki dei ban leh lada jia ba wan lynshop u jumai uba jur.
Hangne ha Shillong, kane ka mock drill kala sdang da ka jingpynriew siren kaba long kum ka jingmaham ia ki nongshong shnong ba kin long lypa kiba la pynkhreh ialade ia ki jingma kiba ap ban wan lada khynniuh u jumai uba jur.
Ia kane ka mock drill la pynlong ha ka surok ha Polo bad ki surok na Polo sha Wahingdoh, Polo Super Market, ki dukan kiba don ha ka thaiñ Polo, Hotel Polo Towers, SBI building, Polo bad MeCEL, Lumjingshai, Samkhamti Petrol Pump, Urkaliar, Female Health Worker, School of Nursing and School of Nursing, TTC, Ganesh Das Government Hospital, Lawmali, St. Xavier’s School, Polo, Pynthorumkhrah Golflinks Higher Secondary School bad Shillong Secondary School, Forest Colony.
Ia ka Incident Command Post, Medical Camp, Staging area, Relief Camp, Base Camp la buh ha SRGT Parking lot bad ha madan 3rd Ground Polo.
Ia kane ka Mock Exercise la pynlong kaban iasyriem kum jingkyiuh u jumai kaba la jia ha u snem 1897 bad ka jingkhie une u jumai kala sdang na Shillong bad udei u jumai uba khlain tam ha ka histori.
Ha kane ka sngi la wan ban iashimbynta da ki bor pyniaid District, ki shipai, ki pulit, NDRF, SDRF, Fire and Emergency Services, Hospitals, Skul, College, ki kynhun sengbhalang, nongshong shnong, ki dkhot ka Bharat Scouts and Guides, Indian Red Cross Society, NSS, Aapda Mitra bad kiwei kiwei.
Ka jingpynlong ia kane ka Mock Drill kala pynmih pat ia ka jingdheng kali ha kylleng ka nongbah Shillong ha kaba bun ki briew kim shym la tip ba kan don ka Mock Drill.
Kane kajuh ka exrcise kala long ruh ha Jowai, West Jaintia Hills, west Khasi Hills, Ri-Bhoi bad South West Khasi Hills nalor ka Ri-lum Garo.
