Shillong, Risaw 11 : U Vice Chairman ka NITI Aayog Suman Kumar Bery ha ka sngi Balang ula ong ba lada ka Sorkar ka kwah wanrah ia ki buit treikam ha ka roi ka par ban nym ieh iano iano ruh shadien, kan hap ban pyrkhat bha ia ki 200 million ngut ki paid riewlum.
U Berry uba dang wan iuhkjat nyngkong eh ha Meghalaya bad ka thain Shatei Lam Mihngi, ula leit iuhkjat ha ka Ophis jong ka Hima Mylliem kaba don ha Mawkhar, Shillong.
U Syiem ka Hima Mylliem ula pdiang sngewbha bad pynkup burom ia une u Heh ka NITI Aayog da ka ryndia ha ka jingia donlang ki Myntri bad ruh u Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem.
Haba iakren bad ki nongthoh khubor, u Berry ula ong ba u Myntri Rangbah Duh ka Ri Narendra Modi ula pynleit jingmut bha sha ki jingeh bad ki kam jong ki paid riewlum. Ula ong ruh ba ki paid riewlum ki dei shibynta na ki paid nongshong shnong ka Ri India ba kongsan bha hynrei bunsien kim ju ioh ia ki jingkyrshan lyngba ki skhim ka Sorkar pdeng.
“(Namar kata), ka NITI Aayog hapoh ka Ri baroh kawei ym tang ha ki Jylla, kumba kala shimkhia bha ia ki ishu ki paid riewlum namar lada phi kwah ia ki buit treikam kiba paka bha ha ka roi ka par ka ban nym ieh iano iano ruh shadien, phi tip ba phi hap ban pyrkhat lang ia ki 200 million ngut ki paid riewlum ka Ri” ula ong.
Une u Vice Chairman ka NITI Aayog ula pynpaw ruh ia ka jingkwah ban tip shaphang ka kam bad ka bor jong ka Autonomous District Council (ADC) bad ong “Ngam shym la pynkhreh ialade halor ka kam ban ai song pisa hynrei kane hi ka dei ka kam jong ka Sorkar Jylla ym jong ka Sorkar Pdeng”.
U Bary ula ong ba ka kamram jong ka NITI Aayog kadei ban lum jingtip bad ban pyni iaki lynti naka bynta ban kyntiew iaki jylla bad iaka ri India baroh kawei.
U Bary ula ong ba ka kamram kam dei tang ban lum jingtip lane sakhi naka bynta ka Sustainable Development Goals (SDGs) hynrei haka juh ka por ban iatreilang naka bynta ban poi shaka thong bad ban ioh kheit ia kawei kaba ka jylla lane ka Ri ka don ka thong.
Ula ong ba naka liang u myntri rangbahduh ka ri India u Narendra Modi u don ka thong ban kyntiew iaki riewlum jong baroh ka Ri India namar watla ki riewlum kidei kiwei ki jaitbynriew ki ban kyntiew iaka Ri hynrei la sngewthuh ki jaitbynriew riewlum kim shym la ioh ki lad jingiarap kaba tista khamtam hala liang pisa.
Haba iadei bad ka jingiarap tyngka shaki District Councils (ADCs), u vice chairman ka NITI Aygog ula ong ba kane ka hap haka jingialam ka sorkar jylla ym haka sorkar pdeng.
Haba pynpaw ba ha man ki kyndong kynshot ka India ki don ki jingiapher, u Bery ula ong “Ngi kum ka NITI Aayog ngi don hangne ban shakri ia ki Jylla. U Myntri Rangbah Duh u ju ong bha bad ngeit ba ka Ri India kan kiew lada ki Jylla ki kiew”.
Ula pyntip ruh ba ka jingwan jong u sha Meghalaya ka dei tang ka jingwan burom ym kaba wan da ki agenda. “ Hynrei ka dei ka kabu ia nga ban sngewthuh ia ki ishu bala mad da ka Jylla…dei namar kata nga la wan hangne” ula bynrap.
