Gangtok, Risaw 17: Ka jingiap na ka jingshlei um ha Sikkim kala kiew sha ka 50 ngut bad haduh 142 ngut ki briew ki dang jah rngai naduh ka sngi ba suba shah rong ha ka umsaw jong ka Wah Teesta, kaba jia ha ka step phyrngap sngi Balang.
Kat kum ka khubor, 27 tylli ki metiap la lah na ka wah Teesta kaba don ha ka thain ba shatei ka West Bengal ha kine ki lai sngi bala leit noh.
“Hynniew tylli na ki metiap la dep ban pynithuh hynrei kiba bun ki dei ki bym pat lah ithuh satia” ong ka khubor.
Kat kum ki khubor, ki shipai Indian Air Force kila pyrshang la bunsien ban leit iarap bad ai jingiarap da ki Mi17 helicopter sha ki lanot ha Lachen bad Lachung hynrei kane ka jingpyrshang kala pulom namar ka jingpynthut jong ka suin bneng.
La iathuh ba ki shipai kila pyrshang ban mih da ki helicopter na Bagdora bad Chaten ban leit pynpoi ia ki marbam bad ki dawai dashin sha Lachen bad Lachung hynrei ka suinbneng kam shym la ailad satia.
Ka jingiathuh lypa jong ka IMD ka pyntip ba ka suin bneng ha Lachen bad Lachung kan dang sniew ha kine ki san sngi ban wan namar ka jingdum lyoh. Namar kane, ka jingleit shaw ia ki 3000 tam ki nongshangkai pyrthei kala don ha ka jingeh.
U Myntri Rangbah ka Jylla Prem Singh Tamang ula pynlong ia ka jingialang bad ki Heh Ophisar hala ka jong ka Iingsah ha ka jingiadonlang ki heh shipai Indian Army, Air Force, Border Roads Organisation, NDRF bad ka Tnad Pulit, ban iapyrkhat ia ki lad ki lynti kumno ban leit iarap bad pynpoi jingiarap sha ki jaka ba jynjar ba poi.
Ka Sorkar kala pynbna ruh ban ai song jingiarap ba mar T.4 lak sha ki bahaiing hasem jong ki briew kiba iap ha kane ka jingshlei um.
