Shillong, Risaw 04 : Ka Meghalaya chapter of the Human Rights & Anti-Corruption Youth Power of India (MRAYPI) ha ka sngi Balang, kala phah tuklar ha u Lat ka Jylla Phagu Chauhan ba un bthah ia ka Sorkar Jylla ba kan thaw noh mardor ia ka Police Accountability Commission (PAC) hapoh ka Tnad Meghalaya Police kumba la kdew ha ka State Police Act, 2010.
“…Nga kyrpad rit ia u Lat ka Jylla ban sngewbha kren lem ia ka kam bad ka Sorkar Jylla khamtam bad ka Tnad kam Pohiing, u Chief Secretary bad Director General of Police ban pyntreikam ia ka Act bad ban thaw ia ka Accountability Commission na ka bynta ka bit ka biang jong ka Jylla bad ban ioh ia ka jingbishar kaba hok” ong u Kingstone Bolwari, Working President ka MRAYP ha ka shithi, kaba la aiti sha u Symbud Myntri Rangbah ka tnad kam pohiing Bah Prestone Tynsong.
Ula kyrpad ruh ia ka jingdonkam ban thung ia u Chairperson bad kiwei ki dkhot jong ka Accountability Commission kat kum ki kyndon 73 (2), 74(1) (2) jong ka Meghalaya Police Act, 2010.
U Kingstone Bolwari ula ong ba katkum ki kyndon section 74 (2) jong ka Act ka kdew ba u Chairperson bad ki dkhot ka Accountability Commission kin dei ban shah thung lyngba ka Committee ba don lang u Myntri ka tnat kam pohïing kum Chairperson, u Chief Secretary, u Home Secretary bad Director General of Police (DGP) haba bynrap ba ka kyndon 73 (2) ki kdew ba ka sorkar jylla hapoh 3 bnai bala treikam ka Act kadei ban thaw ruh iaka Accountability Commission.
Lah ban kdew ba ka Act kala treikam naduh 7 Rymphang 2011.
U Working President ula ong ba ka jingbymdon ka Accountability Commission, ka pynduh lang iaki paidbah lada ki donkam ban ujor pyrshah iaki Pulit lada don napdeng ki Pulit kiba pyndonkam bakla iaka bor, ka jingkem iaki paidbah khlem kano kano ka daw bad kiwei kiwei kiba pyrshah iaki paidbah.
“Namar kane ban wanrah kano kano ka jingiasngewpher jingmut bad ka jingbym iashngain hapdeng ki paidbah bad ki Pulit, donkam ban thaw iaka Police Accountability Commission naka bynta ka bha ka miat jong ki paidbah bad ka tnat Pulit” ula ong.
