Delhi Nailur 30: Ka jingdawa ban pynrung iaka ktien Khasi ha ka Khyrnit kaba Phra kala sawa jam hapoh nongbah Delhi ha kaba ki nongialam jong ki seng saiñ pyrthei, ki nongialam sengbhalang bad ki kynhun bapher kill ia mih ryntih ban iashimbynta haka jingiakhih ha Jantar Mantar,Delhi.
Ha kane ka jingiakhih kaba la pynlong da ka Khasi Author’s Society ryngkat ka jingiatreilang bad ka Hynniewtrep Delhi Association (HTDA) bad KSU Delhi Unit, la wan iashimbynta da ki Myntri Sorkar kiba kynthup ia ka Kong Ampareen Lyngdoh bad u Bah Paul Lyngdoh, ki MLA, ki MDC bad ki nongialam jong ki sengbhalang.
Ki nongkren ha ka jingialang kila dawa naka sorkar pdeng ba kadei ban pynrung noh ia ka ktien Khasi ha ka Khyrnit kaba Phra jong ka riti synshar ka ri bad kam dei ban pynslem shuh namar ka ktien Khasi kadei kaba la bit la biang bha ban ioh noh iaka jingithuh kaba pura hapoh ka ri India.
Haba iakren bad u Myntri ka tnad Arts & Culture u Bah Paul Lyngdoh ula ong, ba ka sorkar jylla kala dep ban phah ia ki jingpynshai kiba la pan da ka Ministry of Home Affairs jongka Sorkar Pdeng ha kaba iadei bad ka jingdawa ban pynrung ia ka ktien Khasi haka Khyrnit kaba Phra jong ka riti synshar ka ri.
“Na ka por sha ka por, ka sorkar jylla kala dep ban phah ia ka jubab halor ka jingpan jingpynshai jongka MHA ha kaba iadei bad ka Resolution na ki jingtip kiba ka ioh naka Khasi Author Society bad ngi la pyndep ia la ka jong ka kamram. Ngi sngewthuh ba ka la don ka list ne ka thup jong ki Ktien kiba kin sa ai jingmynjur kiba don baroh 38 tylli bad ka ktien Khasi ka don ha kane ka thup jong ki ktien bad ngi khmih lynti ba hashwa ba ka samoi treikam jong kane ka Parliament kan kut, ia kane ka kam kadei ban poi sha ka thong” ong u Bah Paul.
U la ong ba ka tnad Art & Culture jong ka sorkar jylla, kala ai jingkyrshan iaka KAS ban pynlong ia ka National Seminar bad u dap da ka jinsgngewtynnad ba ha ka jingiakhih ha Jantar Mantar la wan ban iashimynta da ki nongialam seng sain pyrthei, ki nongialam jong ki sengbhalang bapher bapher.
“Ka jingwan ki nongialam jong ki seng saiñ pyrthei, ki sengbhalang kadei kaba pher bad kaba phylla kaba kynthup ia ki nongialam na baroh ki liang, kaba ki nongthoh bad ki nongwadbniah kila ia don ryngkat bad kum kane kadei ka jingsdang ia kiei kiei kiba bha tam bad nga ngeit kan poi sha ka thong” ong u Bah Paul.
Katba ka Kong Ampareen Lyngdoh kala ong, ba kane ka jingiakhih ha Delhi kadei ka buit kaba thymmai bad kaba ym pat ju leh mynno myno bad ka sorkar jylla kala wan ban ai mynsiem ia kane ka jingiakhih kaba la pynlong da ka KAS.
“Dang ha ki 3-4 taiew, ka sorkar jylla kala wan iakynduh ia u Myntri Rangbahduh ka ri ban ong ba phi la shu ia sngap mynthi bad ha kata ka jingdawa baroh, kaba hakhmat tam ba hadien ba ngi la pyndep lut ia baroh ki kyndon ban ioh noh ia ka jingithuh ha ka Khyrnit kaba Phra bad balei haduh mynta phim pat leh eiei halor kane ka jingdawa” ong ka Kong Ampareen.
Na ka liang u Chairman ka KHADC u Bah Lamphrang Blah ula iaroh iaka KAS kaba la pynlong ia kane ka jingiakhih ha Jantar Mantar bad kumta ka sorkar India mynta kadei ban iohsngew iaka sur jongka jingdawa ka jaidbynriew ba kadei ban pynrung noh ia ka ktien Khasi haka Khyrnit kaba Phra ka riti synshar ka ri.
Ula kyntu iaka KAS ba kadei ban iaid shakhmat ban iakhun ban pynurlong iaka jingangnud jong u paidbah namar haba ka im ka ktien ka im ka jaidbynriew.
