Shillong, Naitung 18: Ka Sorkar Pdeng bad ka Sorkar Jylla kila pynkhreh mynta ban iasoi noh shen ia ka soskular “Sangeh iasiat” ne “Ceasefire Agreement” bad ka kynhun kiengatiar ka Ri-lum Khasi Jaintia – ka Hynniewtrep National Liberation Council (HNLC) ban sdang pyntyllun noh shakhmat ia ka jingiakren iasuk kaba pura.
Kat kum ka khubor ba iajan bad ka Tnad kam Pohiing ka Jylla, ka jingiakren iapynbeit ia ki jnit ki jnat hapdeng ki Ksiang ka Sorkar Pdeng bad Sorkar Jylla lem bad u Nongmihkhmat jong ka HNLC kala dep pura mynta bad kaba sah ka long satang ban shu pynbna noh ia ka jingsangeh iasiat (ceasefire) bad ban iasoi ia ka soskular halor kane ka bynta.
Lah iathuh ba nalor ka rai sangeh iasiat, ka jingiapynbeit kala mih ruh halor ka jaka ban pynsah shi jaka ia ki Nongialam bad ki Dkhot ka HNLC kaba ki ong ha ka ktien nongwei-ka Designated Camp.
“Ki sienjam ban shim shuwa ka jingiakren iasuk kan long hi thik kumba long ha ka jingiakren iasuk bad ka Achik National Volunteer Councilo (ANVC) kaba la pynduh pyndam mynta la bun bun snem” ong ki Heh Ophisar kiba pyntip ba mar syn dep pynbeit lut ia baroh ki jingdonkam, ka jingiakren iasuk kaba thikna kan sa iaid noh shakhmat.
Ka khubor ka iathuh ba kine ki Ksiang ka Sorkar bad u Nongmihkhmat ka HNLC, kila dep iakynduh haduh 4-5 sien ha kawei ka jaka shabar ka Nongbah Shillong (bala buhrieh noh) ban iapynbeit ia ki jingdonkam baroh hashuwa ban lah pynsdang ia ka jingiakren ba thikna.
Lah ioh khubor ba kine ki Ksiang ka Sorkar Jylla bad Sorkar Pdeng, kila iakynduh ruh markhmat ia ki Nongialam jong ka HNLC ha kawei na kine ki jingialang.
Ka Sorkar ha u bnai Lber, kala thung ia u Ophisar Indian Administrative Services (IAS) bala shongthait Bah Peter S Dkhar ban long u Ksiang u ban pyntyllun shakhmat ia ka jingiakren iasuk bad ka HNLC.
Ia u Bah Peter uba dei u Deputy Commissioner barim ka East Khasi Hills bad West Jaintia Hills, la iarap lang da u Nongai jingmut (Adviser) ka Ministry of Home Affairs (MHA) uba dei u Ophisar Indian Police Services (IPS) bala shongthait u AK Mishra.
Na ka liang ka HNLC kala thung ia u President ka Hynniewtrep National Youth Front (HNYF) Bah Sadon K Blah kum u Nongmihkhmat ban iakren pynbeit ia ki jnit ki jngat kiba donkam ban pyndep bad ka Sorkar ha shuwa ba a jingiakren iasuk kan sdang pura.
Lah ban kynmaw hangne, ka jingmynjur jong ka Sorkar Jylla bad Sorkar Pdeng ban iakren iasuk bad ka HNLC kala wan hadien ba kane ka kynhun kiengatiar ka Ri-lum Khasi ha ka sien ba nyngkong eh, kala mynjur ban wan sha ka miej iakren iasuk khlem kano kano ka jingbuh kyndon.
Ka HNLC kala pynpaw ruh ba ka jingiakren iasuk kan ym long shuh halor ka Instrument of Accession ne ka Annexed Agreement hynrei kan long beit halor u pud treikam jong ka Riti Synshar ka Ri
