Shillong, Nailur 22 : Ka Sorkar Jylla kala don jingthmu ban wanrah jingkylla noh ha ki kyndon treikam jong ka skhim Special Rural Works Programme (SRWP) khnang ba ki MLA kin lah ban buh ia katto katne ka song pisa ha kaban ai jingiarap kyrkieh ia ki lanot kiba mad ia ka jinglynshop ki bor ka mariang.
Ia kane la pyntip da u Myntri Rangbah ka Jylla Conrad K Sangma ha ka kynta kylli jingkylli hapoh ka Dorbar Synrai ka Iingdorbar Thaw Ain ka Jylla, kaba kut hynne ka sngi Thohdieng.
Kane ka jingkren u Myntri Rangbah kala mih haba bynrap ia ka jubab jong u Myntri ka Tnad Revenue and Disaster Management Bah Kyrmen Shylla halor ka jingkylli bala wanrah da u MLA ka Mawryngkneng Bah Heavingstone Kharpran halor ka song jingiarap sha ki artylli ki Longiing kiba shah ktah ha ka jingpluh iing.
U MLA ka Umsning Dr Celestine Lyngdoh ula ai jingmut ban buh noh da ka contingency fund ban iarap ia ki longiing kiba shah ktah ha ka jingwan lynshop ki bor ka mariang.
U Myntri Rangbah ula pyntip ba ha ka jingialang ba dang shen jong ka MDA, katto katne ki MLA kila ai ia kane ka juh ka jingai jingmut.
“Watla ngim pat lah ban thaw ia ka contingency fund ia mynta namar kan sa ktah ia ka pla tyngka hynrei kaei kaba ngi la pynkhreh ka long ban shu pynkylla ia ki kyndon jong ka SRWP khnang ba kan kham jynsur haba pyndonkam ia ka song pisa ha ka por ba donkam” ula ong.
Shuwa kane, u Bah Kyrmen ula pyntip ba ka Tnad kala dep ban ai ia ka song pisa sha ki artylli ki Longiing jong u Bah Banteiskhem Kharumnuid bad ka Kong Rina Marboh.
“Baroh arngut kila ioh ia ka song pisa ba mar T. 1.35 lak lyngba ka Public Financial Management System (PMS)” ula ong.
