Shillong Nailur 20: U Myntri Rangbah ka jylla Conrad K Sangma hynne ka sngi Balang ula ong, ba ka jingiakren bad ka Sorkar Assam ban iapynbeit ia u pud u sam jong ki 6 tylli ki jaka kiba dang don hapdeng ka jingkajia pud, kan long ha ka taiew ba nyngkong ne ba-ar jong u bnai Risaw.
Haba jubab ia ka Zero Hour Notice kaba la wanrah da u MLA ka VPP na Nongkrem Bah Ardent Miller Basaiawmoit ha ka iingdorbar, u Conrad Sangma ula ong ba u Myntri Rangbah ka Assam u Himanta Biswa Sarma dang shen ula wan sha nongbah Shillong ha kaba kala don ka jingiakren iakhana halor ka kam jong ka jingiakren pynbeit pud.
“Ngi la shim ia ka rai ha ki katto katne ki bynta bad ia kitei ngin sa rah sha ka jingialang kaban long ha ka taiew ba nyngkong ne baar jong u bnai Risaw” ong u Conrad.
Ula ong hadien katei ka jingialang, baroh arngut ki Myntri Rangbah kin sa leit ban jurip iaka Khanduli bad kiwei kiwei ki jaka ban pynsaphriang iaka khubor jong ka jingsuk.
“Nga bad u Myntri Rangbah ka Assam ngi don jingthmu ban leit jurip iaka Khanduli bad kiwei kiwei ki jaka bad ia ki jaka kiba thikna yn sa rai ha ka jingiashong jingialang. Ngin don ia ka jingialang ha katei ka jaka bad ngin iakynduh ia baroh kiba don bynta ban pynthikna ban phah iaka khubor jong ka jingsuk” ula ong.
Ula ong ba ka jingiakynduh ha nongbah Shillong ka long kaba seisoh bha bad baroh ar tylli ki jylla kin iaid shakhmat ban pyntreikam ia ki rai kiba kongsan kiban sa shim ha ka jingialang kaban long ha u Risaw.
Hashwa kane, u Bah Basaiawmoit ula pynrem jur iaka jingkren jong ka Karbi Students Association (KSA) ba ka jingjia kum ha Manipur ka lah ban jia lada ki duh ia ka jaka bad ka ong, “Kane ka jingkren jong u nongialam ka KSA ka dei kaba lah ban pynmih iaka jingiashun ha ka thain khappud”.
Ula pynpaw ba u kwah ban tip la ka sorkar jylla kala shimkhia ia katei ka mat bad ka sorkar Assam khnang ba yn lah ban pynneh iaka shongsuk shongsaiñ ha ka thain khappud.
Ula ong, “Ia katei ka mat ym shim la patiaw da u Myntri Sorkar ka Assam Minister, Piyush Hazarika uba la ong kylla ba ia kum katei ka jingkren ym dei ban kren satia namar kan pynthud ia ka jinglong jingman.
U Conrad ula pyntip ba ha ka 30 tarik u Nailar 2023, ka Jaintia Students’ Movement bad ka KSA kila shong jingialang ha Diphu, East Karbi Anglong District, Assam ha kaba kila iatai sani ban wanrah iaka jingsuk bad jingshngain ha shi lynter jong ka khappud jong ka jylla Assam-Meghalaya.
Ha katei ka jingialang, la thaw iaka Students Committee for Peace Initiative bad kane ka committee kan trei ban wanrah biang iaka jinglong jingman kaba biang ha ka thain khappud bad ban pynduna iaka jingsngew pher jaidbynriew.
Ula pyntip kumba long mynta, ka jinglong jingman ha ka thain ka long kaba la peitngor bha, u Myntri Rangbah ka Assam ula pynthikna ba la shim ia baroh ki sienjam ban pynthikna ba kan ym don ka jingpynthud ia ka shongsuk shongshngain bad ki pulit jong ka District kila long kiba husiar bad kila iaid pahara ha kylleng ki bynta jong katei ka thaiñ.
Ki pulit ki leit ban iakynduh man la ka por ia ki nongialam shnong bad ia ki riewpaidbah ha kaba kila kyntu ban pynneh iaka jingsuk bad jingshngain ha katei ka thaiñ.
Ula pyntip ba la pynjur iaka jingbuh ia ki bor pulit ha Khanduli, Lapngap, Saitsama Outpost bad Nartiang Police Station ban peit iaka jinglong jingman ha katei ka thaiñ.
Ula ong ba ka sorkar jylla kan bhah ia 7 tylli ki Border Putposts kiba don ha Rani-Jirang BOP ha Ri Bhoi, Langpih BOP bad Umwali BOP ha West Khasi Hills, Mooriap BOP ha East Jaintia Hills, Tihwieh BOP bad Mukroh BOP ha West Jaintia Hills.
Ka jingthaw ia kitei ki BOP kan ai ka jingiarap kaba khraw ha kaban tehlakam iaka jingiashrut ne jingiakynad ha khappud bad kaba kham kongsan bha ka long ban pynkhlain iaka jingdon jong ki heh pulit.
