Nongstoin, Nailur 20 : Bun tylli ki Iing kila orpait bad pei thliew ki tnum na ka jingwan hap ki maw ba kynnoh pynbthei bomb khlem akor jong ki Nongshna surok National Highway ka NHIDCL kaba dang iaid shaid shaid mynta na Nongstoin sha Rambrai.
Kane ka jingjia kala jia ia ki Longiing kiba dei na ka shnong Steplanglur, kawei na ki shnong kaba don ha lynti sha Rambrai.
Kane ka jingorpait ki jingtei bad jingpei thliew ki tnum kala jia ruh ia kawei ka skul bala tip kum ka Juriawthei Presbyterian Lower Primary School, Steplanglur, Balang Presbyterian Mawlieh.
Ki Longiing kiba la mad ia kane ka apot ki kynthup ia ka Iing u Bah Teiborlin Nongsiej, Bah Kloilan Syiemlieh, bah Briplingstar Kharbani, kong Bistiful Nongsiej, kong Listiful Nongsiej, kong Wandarisha Nongsiej bad kiwei kiwei.
U Nongthoh khubor Ka Shlem haba iakren bad kine ki lanot, kila pyntip ba hadien kane ka jingjia, kila leit ban iakren bad ki nongtrei jong ka kompani ba pynshna ia ka surok hynrei la kynnoh ba kine ki nongtrei kila leh bym patiaw bad kynhat pynban ba kin leit ujor sha ki bor district.
U Sordar ka Shnong Steplanglur Bah Syntarning Wanniang ula ong ba kane ka kompani kala pynkhein ia ki kyndon jingbthah haba pynbthei bomb bad kane ka jingpynbthei bomb kala jia bad sngi bad miet haduh ba ki khun Shynrang ka Shnong kila kem bitar.
Ula ong ba lada ki bor District kim tuklar mar mar ia kane ka kam, khlem pep kane ka jingleh jong ka kompani ka lah ban lam sha ka jingjia kaba sngewsih. Ula pynpaw ba ka bor Shnong kan ym lah ban tehlakam lada ka jingleh ka kompani kala long shaba palat.
Kumjuh ruh u Headmaster ka Juriawthei Presbyterian Lower Primary School, Steplanglur, Bah Rockefeller Nongsiej ula ong ba ka jingpynbthei bomb jong kane ka kompani kala long shaba palat liam haduh ba ka iingskul kala julor bad ki lynti iaid kjat ruh kila duh noh.
Ula ong ba ki khynnah skul mynta kila hap ban shu par ia ka riat bala duh ka lynti iaid kjat. Ula iathuh ba ki bor pyniaid ka skul kila leit kyrpad ia ka kompani ba shna surok, ba kan pynmaramot lang malu mala ia ka lynti iaid jong ki Khynnah hynrei ia kane ruh la leh bym patiaw.
Kaba ktah eh ka dei ka jingshah pynjor kawei ka pynthor kba jong kawei ka Longiing Khunswet kaba la long rangbah tang da ka samla kaba khmih bad sumar haduh 6 ngut ki para. Ka jingjulor jong kane ka pynthor ka dei naamr ka jingpyntuid khyndew khlem akor jong ka kompani.
