Shillong Nailur 19: Ki bor pyniaid jong ka skulbah North Eastern Hill University bad ka NEHUSU kila ong, ba ka huri huri hynnin ka miet hapoh jong ka skulbah kala heh namar ka jingwan jong ki briew kiba nabar bad kam dei pat ka jingiakynad iapher jaidbynriew ne niam.
U PRO jong ka NEHU u Dr Davidson Pyngrope ula ong, “Ha ka miet jong ka Sngi Nyngkong, katba u Prefect u dang leit lum ia ka pisa na ka bynta ka bai bam ha kawei ka kamra sah bad ula lap ba kala don ka jingiashet bam hapoh jong katei ka kamra, ia kaba la khang pyrshah ia ki samla pule ban shet ban tiew ha ki kamra sah ki jong ki, kumta ula kylli ia ki balei ki la shet la tiew haba la mana pyrshah katkum ki kyndon treikam jong ka skulbah. Kumta kala mih ka jingiania hapdeng uba sah ha katei ka kamra bad u Prefect jong ka Hostel bad u khynnah uba sah ha katei ka kamra ula kren da ka ktien khlem akor bad kala mih ka jingiashoh”.
U Bah Davidson ula ong ba ha katei ka kamra kiba sah kim dei tang na kane ka jylla hynrei kila don lang ruh ki samla pule kiba na kiwei kiwei ki jylla kumta kam dei satia ka jinghuri hura hapdeng kano kano ka jaidbynriew.
“Kam dei ka jinghuri hura hapdeng jong kano kano ka jaidbynriew hynrei kadei tang ka jingiapher jingmut ki samla pule kiba sha ha ka Hostel No. 19 tang namar ba kila iania namar ka jingshet jingtiew hapoh kamra sah” ong u PRO ka NEHU.
“Katei ka jingjia kala heh kadei namar ba kila don ki briew kiba nabar kiba la wan rung hapoh ka skulbah kiba la shoh la dat bad pynhuri hura hynrei ki bor pyniaid jong ka NEHU kila lah ban pynjai jai noh ryngkat ka jingdonlang jongki pulit” ong u Bah Davidson.
Ula ong ba ha katei ka jingjia, kila don 3 ngut ki samla pule kiba la shu mynsaw malu mala katba uwei pat uba la phlei snam na khmut u dnag don hapoh Hospital ban ioh iaka jingsumar.
“Ka skulbah kan sa shim iaka sienjam ban pynshitom ia ki samla pule kiba la sdang ban pynmih ia katei ka jinghuri hura bad ngin wad ruh mano ba khot ia ki khynnah kiba nabar ban wan shapoh jong ka skulbah. Hynrei kaba sngewsih ka long, ba kitei ki briew kiba wan nabar kila knieh bad tar iaka rejistar kaba la thoh iaka nombar jong ki kali kiba rung ba mih hapoh jong ka NEHU, kumta ngin hap ban tohkit hi ia ki samla pule bad la thung ruh iaka komiti ban khmih bniah halor kane ka jingjia” ong u PRO.
Ula ong, ba ka skulbah NEHU kan ialeh ban tehlakam ia kum katei ka jingjia bad ban ai jingiada bad jingshngain ia ki samla pule, da kaba pynjur shuh shuh iaka jingpahara da ki nongap pahara bad ban pyrkhing iaka por jong ka jingrung jingmih jong ki briew kiba nabar shapoh jong ka jaka sah ne ha phyllaw jong ka Hostel bad la iakren ruh ban pyndait noh da ki kor CCTV ha ki Hostel khnang ba yn lah ban tip mano ba rung bad mano ba mih.
Katba u Finance Secretary ka NEHUSU u Mandor Diengdoh Swer ula ong, “Katei ka jingjia kam dei satia kaba heh, hynrei namar ka jingwan jong ki briew kiba nabar kala heh, ha kaba kila shoh bad ktah kti ia u Vice President jongka NEHUSU, u Dean of Students Welfare, ka kam kadei kaba rit hynrei kala pluh namar ka jingwan jong ki briew kiba nabar”.
“Ngi pynrem jur ia ki briew kiba nabar kiba la wan ban thombor bad pyntieng pynsmiej ia baroh kiba don hapoh ka skulbah NEHU, katei ka jingiakynad kam dei satia ba don kano kano ka jingiapher jaidbynriew, namar u VP ka NEHUSU bad ki 3 ngut kiba la mynsaw kidei ki Khasi kila shah shoh lang bad wat ki bym dei Khasi ruh kila shah shoh lang bad baroh ki khynnah pule kila shah shoh lut” ong u Mandor.
U Mandor ula ong, ba ka NEHUSU ka dawa na u Vice Chancellor ba udei ban shim da ka rai kaba tyngeh namar ba kum kane ka jingjia kam dei kaba jia ka sien kaba nyngkong ha kaba ki briew kiba nabar kila wan ban pynhuri hura bad ka NEHUSU ka pynrem jur ia kine ki briew kiba nabar kiba la wan ban shoh bandat ia ki khynnah pule.
Pule lang ia kane: Mynjur ka Sorkar Pdeng ia ka Women’s Reservation Bill : 5 tylli ki mat ba kongsan
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
