Shillong, Nailur 19 : Ka jingkulmar kaba mih hynnin ka miet sngi Nyngkong ha North Eastern Hill University (NEHU) Campus, ka dei namar ka jingiakynad hapdeng ki samla pule Khasi bad ki samla pule Garo nalor ki bar Jylla.
Kane kala paw pyrthei na ka ejahar bala mudui sha ki Pulit ka Mawlai Police Station, da ki samla pule Garo kiba sah ha ka Hotel No.19 ne ka Rangira Hostel, kiba la iathuh lut ia kaei kaba jia ha katei ka miet.
Kat kum kane ka ejahar la iathuh ba hapdeng 40-50 ngut ki samla Pule kiba dei jong kiwei ki Hostel ka Campus, kila leit rung jubor hapoh ka Hostel No 19 khlem da ioh jingbit bad kila shu shoh shu tied ia ki samla pule kane ka Hostel haduh ba bun kila mynsaw bad la pynkit sha Hospital ban ai jingsumar.
Kine ki samla Pule ki pyntip ba mar mar kila pyntip ia kane ka jingjia sha u Hostel Warden bad ki bor pahara ban tehlakam ia ka jingjia bad ban ai jingiada ia ki samla pule jong ka hostel No 19. Hynrei la kynnoh ba kine ki samla pule jong kiwei ki Hostel kila kynjat ia ka jingkhang bad kila rung jubor ryngkat ki tiar ki tar ba nep bad ktah kti ia u Warden, ki Security bad ki samla pule, kaba lam sha ka jingmynsaw ia ki katto katne ngut.
La kynnoh ba kine ki nongwan thombor kila wan da ka jingthmu ban thombor tang ia ki briew ki bym dei ki Khasi.
La kynnoh ruh ba kine ki nongwan thombor kila shoh naphang ia ki briew tad haduh ka jingwan poi ki Pulit ba ki sa phet krad na kane ka jaka.
Kane ka ejahar kala jer kyrteng ruh ia katto katne ki samla Pule Khasi kiba donkti ban leit thombor bad kine ki dei u Friky jong ka Weinia Hostel, Meban (Winia Hostel), Johny (Weinia Hostel), Wantei (Mawthadraishan Hostel) bad u Sam (Mawthadraishan Hostel).
Ka ejahar kala pynpaw ruh ia ka jingsuba kaba jur halor ka jingiadon bynta ki Hostel prefect, Assistant Prefest, Mess Manager bad Asst Mess Manager. La kynnoh ba dei kine ki briew kiba la iasopsop bad ki samla pule Khasi na kylleng ki Hostel ban leh ia kane ka kam pyntriem.
Kine ki samla pule kila pyntip ruh ba kane ka jingjia hynnin ka miet, kam dei satia ka jingjia ba shu jia ryngkhat hynrei ki nongsah ha kane ka Hostel kila mad ia ki jingshah byrngem byrsit ha kiba bun ki khep ha ki por bala leit noh.
Kine ki samla Pule kila kyrpad ia ki Pulit ban shimkhia ha kaban leh eiei noh mardor ia kine ki briew kiba donkti ha kane ka jingthombor khnang ban ai ka jingbishar kaba hok.
Ka NEHUSU halor kane ka jingjia
Ha kajuh ka por, ka NEHUSU kala pynpaw ia ka jingbitar halor kane ka jingjia kaba jia hynni ka miet hapoh ka Hostel No.19.
Ha kane ka jingjia, ki jingkhang bad ki jingkhangiit jong ka hostel kila shah pynpra, ki iit jong ki kali kiba ba pynieng hajan ka hostel kila shah pynjulor.
Halor kane ka jingjia, ka NEHUSU kala kyntu ia ki samla pule ba kin iamih da ka jingiatylli bad ban ialum lang hakhmat ka Administrative Block hynne ka sngi por 12 baje ban dawa kem ia ki briew kiba donkti ha kane ka kam hapoh ka 6 baje janmiet lem kumta kan pynbor ia ki ban khang dam ia ka University tad haduh bala kem lut ia ki briew ba donkti.
 Campus, ka dei namar ka jingiakynad hapdeng ki samla pule Khasi bad ki samla pule Garo nalor ki bar Jylla.){kind=link}