Shillong, Nailur 19: Ka Sorkar Jylla kala ioh haduh T. 135.08 klur ka pisa na ka Sorkar Pdeng naduh ba sdang pyntreikam ia ka Pradhan Mantri Khanij Kshetra Kalyan Yojana (PMKKKY) kat haduh mynta mynne, ong u Myntri Rangbah ka Jylla Conrad K Sangma haba pyntip hapoh ka Iingdorbar Thaw Ain ka Jylla hynne ka sngi Ba-ar.
Haba jubab ia ka jingkylli bala buh da u MLA ka UDP na Shella Bah Balajied K Synrem halor kane ka kam, u Conrad ula iathuh ba ka Sorkar Jylla kala ioh haduh T. 9.67 klur ka pisa na kane ka skhim, kaba dei jong u snem 2022-2023.
Kat kum ka jingong jong u, ka skhim bala pyntreikam lyngba ka PMKKKY ha Sohra ki kynthup ia ka jingshna bha ia ka jingpynpoi um sha Circuit House, Sohra Civil Sub-Division lyngba ka Pumping Water Supply Scheme ba thymmai n aka shyngiar ba marjan bala tip kum ka Um Them Circuit, kaba long haduh T.21,80,600 bad ka jingtei ia ka Rain Water Harvesting ia ka Circuit House Sohra Civil Sub Division ba kot T. 31.65,000.
Halor ka kam ba iadei bad ka District Mineral Foundation (DMF) Fund, u Bah Balajied ula pan jingtip la ki jaka tih par ba shah ktah ki dei kiba la buh hakhmat eh haba pyntreikam ia ka song pisa.
Ia kane, u Myntri Rangbah ula ong ba kat kum ki kyndon, ka jingithuh ia ki jaka ba shah ktah ka dei kaba hap ban khmih bha.
“Kum ka kyrteng, kane ka dei ka District Mining Fund. Kane ka dei ka Trust kaba la khmih ha ka kyrdan jong ki District bad ki Deputy Commissioner ki dei ki Chairman ban leh screening bad ban mang ia ki project bad ka Sorkar Jylla kam tuklar satia ia ki kam ba iadei bad ka jingjied ia ki jaka ne mang ia ka pisa” ula bynrap.
U Bah Balajied ula pynpaw ruh ia ka jingsngewkhia halor ka jingbym kynthup lang ia ki MLA kum ki Dkhot ka DMF wat hapdeng ka jingtip ba kham bha ia ki skhim kiba dei ban pyntreikam hapoh ka District.
U Conrad haba jubab, ula pyntip ba ka Sorkar kala pynmih ia ka jingpynbna ba thymmai ha ka 22 tarik nailar 2022 ha kaba ki MP bad ki MLA jong ki District kila shah kynthup kum ki Dkhot ka DMF. Ula kular ruh ba un sa pynkynmaw biang ia ki bor Distrct halor ka jingdonkam ban pyntreikam ia kane ka jingpynbna kumba ka dei ban long.
Ha kajuh ka por, u Myntri Rangbah ula kular ruh ba ka Sorkar Jylla kan sa pynmih ia ka kaiphod ba shisien shisnem halor ka jingpyndonkam ia kane ka song pisa.
Kane ka jingkular kala mih hadien ka jingkyrpad jong u Nongialam ka AITC bad Myntri Rangbah barim ka Jylla Dr Mukul Sangma, uba la ban jur halor ka jingdonkam ban treikam haba shit haba shai haba pyndonkam ia ka song pisa.
 kat haduh mynta mynne, ong u Myntri Rangbah ka Jylla Conrad K Sangma haba pyntip hapoh ka Iingdorbar Thaw Ain ka Jylla hynne ka sngi Ba-ar.){kind=link}