Shillong, Nailur 18 : Ki bor pyniaid District ka South West Khasi Hills (SWKH), kila pynjari da ka kyndon 144 CrPC ha ki jaka ba don kumba 500 meter ha baroh ki pung dohkha kiba don marjan ki surok ka Public Works Department (PWD) hapoh ka District baroh kawei.
Ia kane ka sienjam la shim halor ka jingjia kaba la jia ha shnong Pamphyrnai, tang namar ka jingiakop khwai dohkha, kaba la wanrah ia ka jingdheng kali kaba shyrkhei bad ktah ia ka iaid ka ieng jong ki paidbah ha ka surok PWD.
Kane ka rai kala mih hadien ka jingsahkut kawei ka ambulance kaba kit ia ka longkmie ba armet namar ka jingbym pyllait lynti ki rawon kiba wan iashimbynta ha ka jingiakop khwai dohkha, kaba lam pat sha ka jingiap noh I Khunlung ba dang shu kha. Kane ka Longkmie ka dang don hapdeng ka jingshitom kaba jur.
Namar ka jingkhapngiah ka surok ha Pamphyrnai, Ksehkohlong, ka ambulance kam shym la lah ban poi sha hospital ha ka pork aba biang bad dei namar kane ka daw, ba la wanjia kane ka jingjia ba sngewsih.
Namar kane ka jingjia ba sngewsih, u Deputy Commissioner ula pynmih shisyndon ia ka hukum ba pynjari ia ka kyndon 144 CrPC ha ki pung dohkha kiba don marjan ka surok PWD.
