Imphal, Nailur 15 : Palat 175 ngut ki briew kila iap ha kine ki saw bnai bala leit noh ha Manipur namar ka thma iapher Jaidbynriew bad haduh 32 ngut ki dang jah rngai katba 96 tylli ki metiap ki dei ki bym pat don ba wan kam.
“Ka thma iapher jaidbynriew ha Manipur kala shim haduh 175 ngut ki mynsiem briew tang ha kine ki saw bnai bad haduh 96 tylli ki met ym pat shym la don ba kam” ong ki Pulit ka Manipur ha ka kyrwoh.
Haba iakren bad ki nongthoh khubor, u Inspector General of Police (AP/Operations) IK Muivah ula ong “Palat 175 ngut kila iap, 1118 ngut kila mynsaw, 32 ngut kiba dang jah rngai. Haduh 5172 tylli ki jingjia wiang ding kynthup ia 4786 tylli ki Iing bad 386 tylli ki jaka mane Blei, kila jia ha kine ki saw bnai”.
“Haduh 5668 tylli ki tiar siat kila shah tuh na ka jaka buh tiar ki Pulit naduh ba sdang kane ka thma. Na kane, ki bor pahara kila ioh kurup pat ia 1329 tylli nalor ki 15,050 tylli ki kuli bad 400 tylli ki bomb” ula ong.
U Muivah u iathuh ba ki bor pahara kila don mynta ha ki 360 tylli ki bunker hapoh ka Jylla bad ia ki jingker bala buh hapdeng ka thain Phougakchao Ikhai bad Kangvai kaba long kumba 1 km eiei ha ka surok Imphal-Churachandpur lah dep ban weng noh ha ka sngi Palei.
Une u Heh Pulit u pyntip ba ka kynhun ki bor pahara kila iaid pahara ha kylleng ki jaka ka National Highway 35 hapdeng ka Imphal bad Jiribam khlem kino kino ki jingpynthut.
