‘India lane Bharat’ : Kynthoh ki Sengbhalang ba dei tang ka buit elekshon Lok Sabha ka BJP

Ap sa ka ‘One Nation, one Election’ bad ‘One Nation, One Religion’

Shillong Nailur 06: Ki Sengbhalang ka jylla kila pynpaw ia ka jingpyrshah kaba jur ia ka jingthmu jong ka sorkar National Democratic Alliance (NDA) ba ialam da ka Bharatiya Janata Party (BJP) ban pynkylla iaka kyrteng jong ka ri naka ‘India’ sha ka ‘Bharat’ haba kynthoh ba kane ka dei tang ka buit elekshon bad pynbiej ia ki nongthep vote kiba dei ki riewngeit Hindu.

Kine ki Sengbhalang ba kynthup ia ka Khasi Students Union (KSU), Federation of Khasi Jaintia & Garo People (FKJGP) bad ka Hynniewtrep Youth Council (HYC), kila pynpaw ruh ba kane ka dei ka sienjam ba nyngkong jong ka Sorkar BJP hashuwa ba kan pynbud ia kiwei pat ki buit barieh ba pynkylla ia ka Ri India kum ka ‘One Nation,One Election’ (kawei ka ri kawei ka elekshon) bad ka ‘One Nation, One Religion’ (kawei ka ri kawei ka niam).

U President ka HYC u Bah Robert Kharjahrin ula ong, ba ka kyrteng ka India kadei kaba mih na ka Sanskrit katba ka ktien Bharat ka wan hi na ka ktien Sanskrit tangba ka noh bha sha ka niam Hindu.

“Katei ka jingthmu ban pynkylla na ka India sha ka kyrteng Bharat, kam don jingmut eiei hynrei kadei tang ban pynkhihwin bad kan shu pynklumar kai ia ki paidbah namar ha ka riti synshar ka ri la shah ban pyndonkam lang ia kitei ki artylli ki kyrteng” ula ong.

“Ha nga shimet nga kham jied iaka kyntien India namar kadei kaba lah ban pdiang bad kam iasnoh bad kano kano ka niam katba ka kyntien Bharat kala snoh lypa sha ka niam Hindu” ula kynthoh.

Ula ong, ban pynkylla iaka kyrteng jong ka ri yn hap ban rah da ka Bill bad hap ban ioh ia ka jingmynjur kaba 2/3 Majority bad yn hap ruh ban phah sha ki sorkar jylla ba donkam ban ioh haduh 50% ia ka jingmynjur na ki sorkar jylla.

“Ka jingthmu ban wanrah ia kane, kadei ruh ban pynkylla ia kane sha ka mat iatai bad ba ki paidbah kin klet noh ia ki ishu kiba kongsan, ban klet noh iaka jingkiewdor ki mar ki mata, ka jingbym iohkam iohjam, ka kam bamsap bad kiwei kiwei bad ba ki briew kin kyndeh iaka elekshon da kaba leit ha ka jingsngewniam” ong u Bah Robert.

U President ka FKJGP Bah Dundee C Khongsit ula ong, ba kane ka jingthmu ka Sorkar National Democratic Alliance (NDA) kaba ialam da ka BJP ka dei tang ka jingthmu politics namar bala jan ka elekshon.

“Ka dei tang ka jingthmu politik namar ba la jan ka elekshon bad ba ka BJP kan ioh ban thied iaka vote jongki riewngeit Hindu” ula ong haba pynpaw “Da lei lei, na ka liang jong ngi, ngin ym lah ban pdiang ia kane ka jingthmu”.

Ula ong, lada pynkylla iaka kyrteng jong ka ri India sha ka Bharat, kan dei ruh ka dawbah la ka BJP kan wanphai biang haka bor synshar ne kan rem haka elekshon kaban long ha u snem ban wan.

U President ka KSU u samla Lambokstarwell Marngar ula ong, ba ki dak ki shin kila sdang ban paw bad na kawei ka snem sha kawei ka snem, kane ka Sokar NDA ba ialam da ka BJP kala sdang ban pyndep ia ki jingthmu kiba ka RSS ka don.

“Ka Ri India kadei kaba kdup ia kiba bun bah ki jaidbynriew, kiba bun bah ki rukom ngeit, ia kiba bun bah ki jait ktien bad ki trai riewlum, hynrei ka jingthmu ban pynkylla iaka kyntien India sha ka Bharat ka don ka jingiabnoh bad ka jingngeit niam Hindu bad kadei kawei na ka thong jongka RSS ban pynbor iaka sorkar BJP ba kan pyndep bad ka rukom leh jong ka sorkar BJP, ym lah ban len ba ka long kaba noh beit sha ki Hindu” ong u Lambokstarwell.

“Ha ka kyrteng India ruh, ia ngi ki thombor beit bad lada ai kyrteng Bharat ruh ia ngi kin thombor beit, kaba kongsan ia ngi kum ka seng ka long ba ngi donkam ia ki aiñ katkum ka riti synshar ka ri ban ioh iaka jingiada, ha kaba ngi la tyrwa ban pyntreikam iaka Inner Line Permit (ILP) ban kynthup noh iaka ktien Khasi ha ka Khyrnit ba Phra jong ka riti synshar ka ri bad kiwei ki mat kiba iadei bad ka koit ka khiah, ka pule puthi bad kiwei kiwei” ong u nongialam ka KSU.

U Bah Robert bad u Bah Dundee kila ong, ba kam dei kaba suk ban pynkylla iaka kyrteng jong ka ri namar ka jinglut jingsep kan poi da ki hajar klur tyngka namar yn hap ban pynkylla noh iaka pisa jong ka ri, ki kot ki sla kiba bun jait jong ka sorkar pdeng bad ki sorkar jylla bad kane ka jingthmu kan wanrah pynban iaka jingduhnong kaba khraw iaka ri baroh kawei.

Ki nongialam sengbhalang kila ong, ba kane ka jingthmu kadei kawei na ka sienjam kaba ka seng BJP ka shim ban poi pat sha u pud ban pyrshang pynurlong iaka jingthmu “One India, One Religion”, “Kawei ka Ri, Kawei ka Niam” bad ka dei ruh ka jingthmu ban pynurlong iaka jingthrang jong ka seng niam ki Hindu ka RSS.

“Mynta ka pyrshang ban pynkylla iaka kyrteng jong ka India sha ka Bharat, hadien kane, kan wanrah iaka ‘One India’, ‘One Election’ bad kan pyrshang pat ban wanrah iaka ‘One India’, ‘One Religion’ bad kane ka long kaba i ma kaba ap ia ngi kum ki jylla kiba ritpaid kiba don ia la ka jong ka jingngeit” ong u Bah Dundee.

U Nongialam ka KSU ula ong ba lada ka BJP ka pyrshang ban leh jubor, ka thma pohiing kan sa jia ha kylleng ki jylla jong ka ri ba kin ym lah ban shu nion jubor ia ki rit ki ria namar ki don ia ka hok ban im, ka hok ban pynthikna iaka jinglong kyrpang ka jongki bad lada ki hehpaid kin shu leh katba mon kan ialam sha ka lynti kaba mynsaw.

“Nga ioh tang kane kawei haba nga ioh ban iakren bad ki jaidbynriew kiba don ha ka thain shatei lammihngi ba lada kata ka jingthombor ka long marmar ne suki pa suki, lada kum kata ka ïa ka iai long, uwei u Professor ula dep ban ong, ba ki jaidbynriew ka thaiñ shatei lammihngi ha ka jaka jong u khulom kin sa shim da ka tiar, ha kata ka por ka jingkieng tiar ka dei namar ka jingshah thombor bad ban pynneh iaka jonglong tynrai jong ka jaidbynriew ka jongki” la pynkut u nongialam ka KSU.