Shillong Nailur 06: U Symbud Myntri Rangbah ka jylla ba khmih ia ka tnad PWD (R&B) Bah Prestone Tynsong hynne ka sngi Balang, ula iakynduh ia ki heh ka Ministry of Road Transport and Highway (MoRTH), National Highway Authority of India (NHAI) bad National Highways & Infrastructure Development Corporation Limited (NHIDCL) ha Nongbah Delhi, ban iakren halor ki jinglong jingman jong ki surok kiba don ha ka jylla Meghalaya.
U Bah Prestone ula iathuh ba ha kitei ki jingiakynduh bad ki heh jong ka sorkar pdeng, la shim ia ka rai ban pynsted noh ia ka kam ki jam ban shna iaka surok na Shillong sha Dawki bad khamtam eh ban maramot noh mardor ia kane ka surok ka ba la sniew ban pynsuk ia ka leit ka wan jong ki paidbah.
Ula ong ruh ba ha katei ka jingialang la shim rai ruh ban sdang maramot noh iaka surokbah National Highway-6 na Jowai-Lumshnong shaduh Ratacherra bad la khmih lynti ba ia kane ka jingmaramot ia katei ka surok yn sdang noh naduh ka taiew kaban wan.
U Bah Prestone ula pyntip ba naduh u Naiwieng mynta u snem, yn buh syndon da ka kompani ka ban peit ban khmih ia katei ka surok bah baroh kawei.
Ha kane ka jingleit iakynduh, iau Bah Prestone la synrang da u Chief Engineer ka National Highway CN Sangma bad u Superintending Engineer National Highway u Bah Rilang Lyngdoh.
