Nongstoin, Nailur 5: Ban kynmaw burom ia ka sngi kha jong u Dr.Sarvepalli Radhakrishnan, u Vice President ba nyngkong duh ka Ri bad u President barim jong ka Ri India, ka District School Education Officer West Khasi Hills District Nongstoin, ha ka 5 tarik Nailur 2023, ka la rakhe ia ka ‘Sngi kyrpang ki Nonghikai kaba 62’ ha Bishop Hall, New Nongstoin.
Kane ka jingrakhe ka long kum shi bynta ban pyrto ia ka jingshakri bad ka jinglenlade jong ki nonghikai, na ka bynta ban tei bad pynwandur ia ka lawei jong ki khynnah kumjuh ruh na ka bynta ka bha ka miat ha ka imlang ka sahlang.
La sdang ia kane ka prokram da ka jingkren pdiang na I Kong. D. Hujon, SDSEO, Nongstoin ha ka jing don ryngkatlang jong u Bah R. G. Momin, MLA Chairman Meghalaya Mineral Development Corporation, Rambrai Jyrngam Constituency kum u Kongsan, I Kong. L.Syiemlieh, Rtd. DSEO Nongstoin kum ka nongshah khot kyrpang, ki Principal, nonghikai ki khynnah skul bad kiwei kiwei kiba la wan pynshit pynshngain ha kane ka sngi kyrpang jong ki nonghikai.
Haba ai jingkren ha kane ka sngi u Kongsan Bah R.G Momin, u la ai ka jingiaroh ia ka jingtrei shitom jong ki nonghikai, ba ki long kum ki rishot jong ka imlang ka sahlang bad ki nongprat lynti na ka bynta ka lawei jong ki khynnah bad ka lawei jong ka ri bad ka jaitbynriew.
“Ka kam nonghikai ka dei ka kam kyntang bad ka long shisha kaba eh bad kaba jwat khamtam eh ban hikai ha ki jaka kyndong jong ka distrik. Ka kam hikai kam dei satia ka kam lum pisa hynrei ka dei ka kam kaba khot ia ka jinglen lade, ka jingaiti bad ka jingtrei shitom”, ong u kongsan.
U la ong ruh, “Nga kyntu ia baroh ki nonghikai ba kin trei shitom khnang ban kyntiew ia ka kam pule puthi hapoh ka distrik. Kumjuh ruh sha ki khynnah ruh ba ki dei ban lap miet ha kaban trei shitom, pule minot bad ban don ka mynsiem jong ka jingsngewrit khnang ba ka lawei ka jong ki kan phyrnai”.
Ha kane ka sngi lehkmen nonghikai, la pynkup burom ia ki hynriew ngut ki nonghikai na ka bynta ka khusnam State Award 2023 bad District Award 2023, kaba kynthup ia u Babu Sisingh Ryntong nonghikai jong ka New Nongstoin ‘B’ Govt L.P. School. Katba u Babu Sylvester Syiemlieh, nonghikai jong ka St. Peter’s Higher Secondary School Pyndengrei (Secondary Level) state award, I Babu, Bertila Dkhar Headmistress Mawrang U.P. School (Upper Primary Level) bad I Babu, Celina Shangpliang Head Teacher, Secret Heart RCLP. School (Lower Primary Level), ki la ioh pdiang ia ka khusnam District Award 2023.
Kumjuh ruh u Babu Olbestar Kharsyntiew nonghikai jong ka B.P.L Secondary School, Mawphetkhlam, u la ioh pdiang ia ka khusnam Best Scout Master. Katba I Babu Daria Iawren nonghikai jong ka Sibsing Memorial Higher Secondary School Nongpyndeng, I la ioh pdiang ia ka khusnam Best Guide Captain.
La ai ia kine ki khusnam sha ki nonghikai na ka bynta ki kam ratbah kaba ki la leh ha kaba iadei bad ka pule puthi jong ki khynnah hapoh jong ka distrik, kumju ruh kiwei pat ki kam kiba ki la leh na ka bynta ban kyntiew ia ka imlang ka sahlang.
La pynbyrngia ia ka prokram ha kane ka sngi da ki jingrwai, ki drama, ki skit, ka shad tynrai bad kiwei kiwei kaba la shim bynta da ki khynnah jong ki skul kiba pher bapher napoh ka district. La pynwai ia kane ka prokram da ka jingiarwai lang ia ka National Anthem kaba la ialam da ki khynnah skul jong ka K.J.P. Synod Sepngi Higher Secondary School Nongstoin.
