Shillong, Nailur 05: Ka seng Jaintia Students Union hynne ka sngi ka Baar, kala ai da ka jingthoh sha ka Myntri ka sorkar jylla Kong Ampareen Lyngdoh ba dawa weng noh iaka kyrteng jong uwei u bar jylla uba pyndonkam bakla iaka syrnot shnong ban ioh pule MBBS na ka bhah jongka sorkar jylla.
Katkum ka kyrwoh na ka seng JSU kala pynpaw ba kala shem ba don uwei na kiba ioh bhah kyrpang ban leit pule MBBS na ka bhah jong ka jylla bad ka seng kala lap ba une u briew ula pyndonkam bakla ban ioh leit pule MBBS na ka bhah jongka sorkar jylla khlem ka jinglut jingsep nalade.
Kala pyntip ba ka seng kala lap ruh ba une u bar jylla ula pyndonkam iaka syrnot shong shnong jongka shnong Thangskai kaba don ha East Jaintia bad ki kmie ki kpa une u khynnah dei kiba trei hapoh ka karkhana pynmih dewbilat bad ka shnong kala ai syrnot nongshong shnong tang hynriew bnai.
Ka JSU kala pyntip ba ki nongialam ka seng kala iakren bad u Waheh Chnong Thangskai Bah Phai Syrti bad ula kubur ba ka dei ka jingpyndonkam bakla iaka syrnot shnong da une u bar jylla.
Halor kane ka jingshem, ka JSU kala dawa ba dei ban pynduh pyndam noh ia kane ka syrnot bad ka shnong ka hap leh ia ka ba donkam ban lait na ka jingpyndonkam bakla ki bar jylla ia kane ka syrnot.
Ka seng JSU kala dawa na ki bor Sorkar ba kidei ban peit bniah iaki kot ki sla kiba applai ban lait na ka jingpyndonkam bakla iaki syrnot.
Ki nongialam ka JSU kila pynpaw ba na ka liang jong ka Myntri ka koit ka khiah ka Kong Ampareen Lyngdoh kala kular ban shimkhia iaka jingdawa ka jong ki.
