Nongpoh, Nailur 01: Da ka thong ban rad dyngkhong ia ka jingthmu shalan drok shapoh kane ka jylla Meghalaya bad ban pynduhjait ia u ne u jingdih basniew, ka tnad Pulit ka Ri Bhoi District hynne ka sngi Thohdieng, ka la ioh ban kem ia u wei u briew bad kurup ia u drok ha ka jingkhynra ha surok bah NH-6 ha Shangbangla, Ri Bhoi District.
Katkum ka jingtip ba la iohlum, ki pulit ka Nongpoh Police Station hynne ka nohphai sngi, ki la ioh jingtip halor ka jingthmu ban pynrung tuh ia u drok sha kane ka jylla, ha kaba ki la pynapshrip ha kawei ka jaka ha Shangbangla bad hadien katto katne por, ki la ioh ban bat ia kawei ka kali ba khlem don number satia bad ha ka jingkhynra ia kane ka kali ki la ioh ban kurup ruh kumba 3 synduk sabon u drok heroin ba khia kumba 29.2 grams.
La iathuh ruh, ba ha kane ka jingioh kurup ia u ne u drok, ki pulit ki la kem noh ia u nongniah jong kane ka kali u ba la tip kyrteng kum u Nurul Huda, ba na Nogoan Assam.
Ia une u briew la register case ha Nongpoh Police Station hapoh ki kyndon ka ain NDPS Act. Ka jingtohkit mynta kala iaid shakhmat.
