Tura, Nailar 29: U Myntri ka Tnad Animal Husbandry & Veterinary Department Bah A. L. Hek, ula leit jngoh ha ka sien ba nyngkong eh kum u Myntri ia ka Ri-lum Garo bad kular ba un sa khmih ia ki jingeh kiba iakynduh da ka Tnad bad ban tei pynbha ruh ia ki jingtei kiba la don kynthup ki Farm.
Hadien ba dep pynlong ia ka jingialang bishar kam bad ki Heh Ophisar ka Tnad hynne ka sngi Ba-ar, u Myntri ula iathuh ba ki Ophisar kila pyntip ia ki jingduna bad ki jingeh kiba iakynduh ha ki farm bapher bapher kiba don ha Ri-lum Garo.
Ula ong ba ka jingiakren ka long kaba iar bha bad kaba long halor ki ishu bapher bapher nalor ki soh ba ioh kheit da ki farm, ki institution kiba don hapoh ka Tnad.
“Kane ka jingialang bishar kam (jong ka Ri-lum Garo baroh kawei) ka long ban sjong bishar ia ki jingtei kiba la don hapoh ka thain, ki farm ha ka thain bad ka lynti ban nang pynbha iaki nalor ban wanrah ruh ia ki project hadien habud” ula ong.
Haba pynpaw ba ki don shibun ki jingbym biang, ula kular ba shibun kiei kiei kin sa nang kham janai hapoh ka Tnad.
Kum shibynta jong kane ka jingleit, u Myntri ula leit ban jngoh ia ki farm bapher bapher ka Sorkar bad ruh ia kiwei ki shnat treikam jong ka Tnad.
Ha kane ka sngi, u Myntri ula pyllait ruh ia ki artylli ki kali arshaka bala thied n aka Rashtriya Gokul Mission (RGM), kaba la mang ia ki MAITRI (Nongtrei AI) khnang ba kin lah ban leit ai ha ka por kaba biang ia ka Artificial Insemination (AI) ha ki iing jong ki Nongrep.
Pule lang ia kane: Bthah ka High Court ia ka Sorkar ban tohkit bniah ia u Pulit MPS ba suba bamsap
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
