Shillong, Naitung 15: Ka kynhun ki nongdie dohsyiar hapoh ka lama jong ka Meghalaya Poultry Association ki la kyntu ia ki nongdie dohsyiar ba kin hap mih ryntih sha ka jinghikai kumno ban leh khuid ha ki dukan jong ki kaba la pynbeit da ka Commissionerate of Food Safery jong ka jylla kaban long ha ka 19 tarik mynta u bnai ha Community Hall Lawmali.
Katei ka jingkyntu ia ki nongdie dohsyiar ka dei hadien ba ka la don ka jingbthah ba baroh ki dukan die doh ki dei ban pynthymmai lut ia ka rukom buh ia ki doh ha ki dukan jong ki khamtam eh ban buh nyngkong ia ka khuid ka suba.
“Ia kane ka jinghikai yn ai da ka Commissionerate of Food Safety la ka long naduh kumno ban shna ia ki jaka buh ia ka doh bad khamtam eh kumno ban lehkhuid,” ong u nongialam ka kynhun Bah Wanshai Kharchandy haba kren bad ki lad pathai khubor.
Na ka liang ka Association ka pynpaw ruh ba ki pdiang ia katei ka sienjam ba la shim da ka Commissionarate na ka bynta ban pyntikna ba ki dukan ba die ia ka doh khamtam kum ha ki jaka ba long iew bha kin long kiba khuid ba suba.
Katkum ka jingong jong u, ka synjuk ka la pynkhreh ruh mynta ia ki nuska kumno ba kitei ki dukan kin long. La pyni ruh ba kitei ki dukan baroh lai don ki dei ban ker da ka ïit bad pyllait tang kawei ka bynta. La kdew ruh ba ym lah satia ban shu wah ia ki doh kumba ju leh baroh shi katta.
